తమ సంస్థలో ఈ-కామర్స్ దిగ్గజం అమెజాన్ భారీ పెట్టుబడులు పెట్టనుందనే వార్తలపై భారతీ ఎయిర్టెల్ స్పష్టతనిచ్చింది. వాటన్నింటిని గాలి వార్తలుగా కొట్టిపారేసింది. ఇలాంటి నిరాధారమైన వార్తలు అనవసర పరిణామాలకు కారణమవుతాయని పేర్కొంది. ఈ ప్రభావం సంస్థ షేర్లపై కూడా పడుతుందని అందోళన వ్యక్తం చేసింది.
పెట్టుబడులపై వార్తలు ఇలా..
భారతీ ఎయిర్టెల్లో దాదాపు 5 శాతం వాటను 2 బిలియన్ డాలర్ల (రూ.15,000 కోట్లు)తో అమెజాన్ కొనుగోలు చేయాలని భావిస్తున్నట్లు వార్తలు వచ్చాయి. ఈ ఒప్పందానికి సంబంధించి రెండు సంస్థల మధ్య చర్చలు ప్రాథమిక దశలో ఉన్నట్లు ఆ వార్తల సారాంశం. ఈ వార్తలు పెద్ద ఎత్తున ప్రచారమైన నేపథ్యంలో ఎయిర్టెల్ స్పందించింది.
వొడాఫోన్ గూగుల్ డీల్కూడా అంతే...
సంక్షోభంలో చిక్కుకున్న టెలికాం సంస్థ వొడాఫోన్ ఐడియాలో టెక్ దిగ్గజం గూగుల్ పెట్టుబడులు పెట్టేందుకు మొగ్గుచూపుతున్నట్లు ఇటీవల వార్తలొచ్చాయి. ఈ వార్తలపై స్పందించిన వొడాఫోన్ ఐడియా గూగుల్తో పెట్టుబడులకు సంబంధించి తమ ముందు ఎలాంటి ప్రతిపాదన లేదని స్పష్టతనిచ్చింది.
జియోకు మాత్రం పెట్టుబడుల ప్రవాహం..
ఎయిర్టెల్, వొడాఫోన్ ఐడియాల్లో పెట్టుబడులపై వచ్చిన వార్తలు వదంతులుగా తేలినా.. రిలయన్స్ జియో విషయంలో మాత్రం పరిస్థితులు వేరేలా ఉన్నాయి. జియోకు విదేశీ పెట్టుబడుల ప్రవాహం కొనసాగుతూనే ఉంది. ఇప్పటికే ఫేస్బుక్తో పాటు ఐదు విదేశీ ఇన్వెవెస్ట్మెంట్ సంస్థలు జియోలో పెట్టుబడి పెట్టగా.. తాజాగా అబుదాబికి చెందిన మరో సంస్థ జియోలో పెట్టుబడి పెట్టింది. ముబ్దాలా అనే సంస్థ రూ.9,093.60 కోట్లతో జియోలో 1.85 శాతం వాటా కొనుగోలు చేసింది.
