ఎన్నికల హడావుడి ముగిసింది. దేశంలో ఇప్పుడంతా ప్రపంచ కప్ హవానే ఉంది. మే 30న ప్రారంభమైన ఈ మెగా టోర్నీ జులై 14 వరకు సాగనుంది. అయితే ఈ సారి క్రికెట్ ప్రేమికులకు వినోదం అందించడం మాత్రమే కాదు.. టీవీ వ్యాపారులకూ భారీ అమ్మకాలను తెచ్చిపెడుతోంది ప్రపంచ కప్.
ప్రపంచ కప్ ఆరంభానికి ముందే టీవీల అమ్మకాలు ఊపందుకున్నాయంటున్నారు వ్యాపారులు. తాజా గణాంకాల ప్రకారం.. మే నెల మొదటి వారంలో 25-30 శాతం మేర అమ్మకాలు పెరిగాయి. ముఖ్యంగా క్రికెట్ అభిమానులు టీవీల కొనుగోలు జరపడమే ఇందుకు కారణమంటున్నారు.
ఎప్పుడు ప్రపంచ కప్ వచ్చినా టీవీల అమ్మకాలు భారీగా పెరుగుతాయి. ఈ సారీ ఆ జోరు కొనసాగుతోందని అంటున్నారు వ్యాపారులు.
32 అంగుళాల టీవీలపైనే ఎక్కువ మోజు
టీవీ అమ్మకాల్లో ఆధిక శాతం 32 అంగుళాల పరిమాణంలో ఉన్నవాటివేనంటున్నాయి మార్కెట్ వర్గాలు. ఇందుకు కారణం లేకపోలేదు.. 32 అంగుళాల టీవీలపై జీఎస్టీ 18 శాతం శ్లాబులో ఉండగా.. అంతకన్నా పెద్ద పరిమాణంలోని టీవీలు 28 శాతం శ్లాబులో ఉన్నాయి.
అన్లైన్లో, ఆఫ్లైన్లో అదే జోరు
అన్లైన్, ఆఫ్లైన్ రిటైల్ మార్కెట్లు రెండింటిలోనూ టీవీల అమ్మకాలు భారీగా ఉన్నాయి. ముఖ్యంగా బ్యాంకింగేతర రుణ సంస్థలు అందించే నో-కాస్ట్ ఈఎంఐలతో.. పెద్ద టీవీలను కొనేందుకు వినియోగదార్లు మొగ్గు చూపుతున్నారని మార్కెట్ వర్గాలు అంటున్నాయి. వీటికి తోడు ఈ కామర్స్ దిగ్గజాలు అమెజాన్, ఫ్లిప్కార్డ్లు ఇస్తున్న ఎక్స్చేంజ్, ఇతర ఆఫర్లతో 4కే, స్మార్ట్ టీవీలు, పెద్ద పరిమాణ టీవీలకు గిరాకీ భారీగా ఉన్నట్లు తెలిపాయి.
టీవీలు ఇచ్చే అనుభూతే వేరు...
చాలా మంది ఆన్లైన్ ప్లాట్ఫారాల్లో క్రికెట్ను ఆస్వాదిస్తున్నారు. కానీ టీవీలో చూసిన అనుభూతి మాత్రం అవి అందించవన్నది పలువురు క్రికెట్ అభిమానుల మాట.
