Work from Home: ఐటీ ఉద్యోగులు మళ్లీ పూర్తి స్థాయిలో ఇంటి నుంచి పని (వర్క్ ఫ్రమ్ హోమ్‌) పద్ధతికి మారిపోతున్నారు. కొవిడ్ రెండో దశ కేసులు తగ్గాక, కార్యాలయాలకు కొద్దిమంది ఐటీ ఉద్యోగులు వస్తున్నారు. కొవిడ్ 'ఒమిక్రాన్' ముప్పు పెరుగుతున్నందున వీరినీ ఇంటి నుంచే పనిచేయాలని సంబంధిత సంస్థల యాజమాన్యాలు సూచిస్తున్నాయి. సోమవారం నుంచే కొన్ని ఐటీ కంపెనీల ఉద్యోగులు పూర్తిగా ఇంటి నుంచే పనిచేయటం ప్రారంభించగా, బుధవారం నుంచి మరికొన్ని సంస్థలు కూడా తమ ఉద్యోగులకు ఇదే విధంగా సూచించినట్లు స్థానిక ఐటీ పరిశ్రమ వర్గాలు వివరించాయి. 'ఒమిక్రాన్' ముప్పు ఇంకా పెరిగితే ఇంకేం జాగ్రత్తలు తీసుకోవాలనే అంశం పైనా కంపెనీలు దృష్టి సారిస్తున్నాయి. ఈ పరిస్థితులను ఎదుర్కోవడంలో కంపెనీలు, సిబ్బందికి ఏడాదిన్నర అనుభవం ఉంది. ఐటీ ప్రాజెక్టులను యథావిధిగా కొనసాగించేందుకు, ఉద్యోగులు ఇంటి నుంచే పని చేసేందుకు అనువైన సాంకేతిక ఏర్పాట్లు సిద్ధంగా ఉన్నందున, కార్యకలాపాలకు ఇబ్బంది ఉండదని భావిస్తున్నారు.
కరోనా 'డెల్టా' కేసుల తీవ్రత గత ఏడాది ఆగస్టు నాటికి తగ్గడంతో నెమ్మదిగా అన్ని రకాల కార్యకలాపాలు సాధారణ స్థితికి చేరుకున్నాయి. దీంతో ఐటీ కార్యాలయాలకు కొందరు సిబ్బందిని పిలిపించడం మొదలైంది. అక్టోబరు నాటికి మొత్తం ఐటీ ఉద్యోగుల్లో 15- 20 శాతం మంది కార్యాలయాలకు వచ్చి పనిచేయటం కనిపించింది. నెమ్మదిగా ఈ సంఖ్య పెరుగుతుందని, త్వరలో అత్యధిక ఐటీ ఉద్యోగులు కార్యాలయాలకు వచ్చి పనిచేస్తారని భావించారు. విదేశాల నుంచి క్లయింట్లు ఇక్కడి ఐటీ కంపెనీలను సందర్శించడం, స్ధానిక ఐటీ కంపెనీల ప్రతినిధులు వివిధ దేశాల్లోని తమ క్లయింట్లను కలిసి 'ప్రెజెంటేషను' ఇవ్వడం వంటివీ చోటుచేసుకున్నాయి. కానీ నవంబరు నెలాఖరు నుంచి 'ఒమిక్రాన్' ముప్పు పెరుగుతూ రావడంతో, ఇంకొంతకాలం పాటు 'ఇంటి నుంచి పనే' క్షేమకరమని కంపెనీలు భావిస్తున్నాయి. 'కార్యాలయానికి రావొద్దంటూ, ఆయా సంస్థల యాజమాన్యాల నుంచి సూచనలు రావడంతో, కార్యాలయాలకు వచ్చే ఉద్యోగుల సంఖ్య తగ్గిపోతోంద’ని స్థానిక ఐటీ కంపెనీ ఉన్నతోద్యోగి ఒకరు వివరించారు.
ఇతర రంగాల సంస్థల్లోనూ
ఇతర రంగాల సంస్థలు, దేశంలోని ఇతర ప్రాంతాల్లోని వ్యాపార సంస్థల యాజమాన్యాలు కూడా మళ్లీ ‘వర్క్ ఫ్రమ్ హోమ్‌’ కు కసరత్తు చేయడంతో పాటు, ఇతరత్రా తీసుకోవాల్సిన చర్యలపై దృష్టి సారిస్తున్నట్లు తెలుస్తోంది. 'హైబ్రిడ్‌ వర్క్' పద్ధతికి ఇంతకు ముందు నుంచే అలవాటు పడ్డామని, దీన్ని మళ్లీ అమల్లోకి తీసుకువస్తున్నట్లు కొన్ని దిగ్గజ కార్పొరేట్‌ సంస్థల ప్రతినిధులు స్పష్టం చేస్తున్నారు. వ్యాపార కార్యకలాపాలపై ఒమిక్రాన్ పరిణామాల ప్రభావం పరిమితంగా ఉంటందనే ఆశాభావాన్ని సంబంధిత వర్గాలు వ్యక్తం చేస్తున్నాయి. 'దక్షిణాఫ్రికాలో 'ఒమిక్రాన్' ముప్పు త్వరగా తప్పిపోయింది, మనదేశంలోనూ అలాగే జరుగుతుందని ఆశిస్తున్నాం’ అని స్థానిక ఫార్మా రంగ ప్రతినిధి అభిప్రాయపడ్డారు. వినియోగవస్తువులు, ఇంజినీరింగ్‌ రంగాలకు చెందిన వ్యాపార సంస్థలు కూడా తాజా పరిణామాలను గమనిస్తూ, తమకు అనువైన చర్యలు తీసుకోవడం ప్రారంభించాయి.
ఇదీ చూడండి: Udaan: ఉడాన్‌ 250 మి.డాలర్ల సమీకరణ.. వచ్చే ఏడాది ఐపీఓకు!
