అమెరికా విద్యుత్తు వాహనాల తయారీ సంస్థ టెస్లా భారత మార్కెట్లోకి అడుగుపెట్టనున్నట్లు ఇప్పటికే ప్రకటించిన ఆ సంస్థ సీఈఓ ఎలాన్ మస్క్ తాజాగా కీలక వ్యాఖ్యలు చేశారు. ముందుగా దిగుమతి చేసుకునే వాహనాలతో మంచి ఫలితాలు వస్తే.. తయారీ యూనిట్ను ఏర్పాటు చేస్తామని పేర్కొన్నారు. అయితే.. ప్రపంచంలోనే అత్యధిక దిగుమతి సుంకాలు భారత్లో ఉన్నాయని, కనీసం విద్యుత్ వాహనాలకు తాత్కాలిక ఉపశమనమైనా ఉంటుందని భావిస్తున్నట్లు వ్యాఖ్యానించారు.
భారత మార్కెట్లోకి టెస్లా కార్లను తీసుకొచ్చే విషయంలో ఓ ఫాలోవర్ అడిగిన ప్రశ్నకు ట్విట్టర్లో సమాధానమిచ్చారు మస్క్.
"మేము భారత్లో విడుదల చేయాలనుకుంటున్నాం. కానీ, ఏ పెద్ద దేశంతో పోల్చినా.. ప్రపంచంలోనే అత్యధిక దిగుమతి సుంకాలు భారత్లో ఉన్నాయి. భారత్లో డీజిల్, పెట్రోల్ వాహనాలతో సమానంగా పర్యావరణ హిత వాహనాలను పరిగణిస్తున్నారు. అది వాతావరణ లక్ష్యాలకు పూర్తిగా విరుద్ధంగా ఉంది. అయితే.. ఎలక్ట్రిక్ వాహనాలపై సుంకాల విషయంలో కనీసం తాత్కాలిక ఉపశమనమైనా ఉంటుందని ఆశిస్తున్నాను."
- ఎలాన్ మస్క్, టెస్లా సీఈఓ
దిగుమతి సుంకాలు తగ్గించాలని భారత ప్రభుత్వాన్ని టెస్లా కోరినట్లు సీనియరి అధికారి ఒకరు శుక్రవారం తెలిపారు. ఇటీవలే కేంద్ర మంత్రి నితిన్ గడ్కరీ సైతం భారత మార్కెట్లోకి టెస్లా వస్తున్నట్లు ప్రకటించారు. భారత్ ఈ-వెహికిల్స్కు ఎక్కువ ప్రాధాన్యమిస్తున్న క్రమంలో టెస్లాకు అది సువర్ణావకాశం అని పేర్కొన్నారు. అటు తమ రాష్ట్రంలో టెస్లా యూనిట్ ఏర్పాటు చేయబోతున్నట్లు కర్ణాటక ముఖ్యమంత్రి బీఎస్ యడియూరప్ప ఈ ఏడాది ఫిబ్రవరిలోనే ప్రకటించారు.
భారత్లో.. ఆ సంస్థ ఇప్పటికే టెస్లా ఇండియా మోటర్స్ అండ్ ఎనర్జీ ప్రైవేట్ లిమిటెడ్ పేరుతో నమోదు చేసుకుంది.
ఆ వాహనాలపై 100 శాతం..
ప్రస్తుతం భారత్.. పూర్తి స్థాయిలో దిగుమతి చేసుకునే కార్లపై 100 శాతం దిగుమతి సుంకం విధిస్తోంది. అయితే.. 40వేల డాలర్లకన్నా తక్కువ ధర ఉన్నవాటికి 60 శాతం సుంకాలు వసూలు చేస్తోంది.
ఇదీ చూడండి: చెప్పినట్టే భారత్ మార్కెట్లోకి అడుగుపెడుతున్నాం: టెస్లా
