భారత్లో తమ మార్కెట్ను విస్తరించుకునేందుకు ప్రముఖ ఆటోమేకర్ 'స్కోడా' ప్రణాళికలు రచిస్తోంది. ఇందులో భాగంగా.. భారతీయ ప్రయాణికులకు అనువుగా ఉండే.. వివిధ మోడళ్లను విడుదల చేసేందుకు సిద్ధమవుతున్నట్లు ఆ కంపెనీకి చెందిన ఓ అధికారి తెలిపారు.
ఇండియా 2.0 ప్రాజెక్టుతో..
2018లో ఫోక్స్ వ్యాగన్తో జత కట్టిన స్కోడా సంస్థ.. ఇండియా 2.0 ప్రాజెక్టును చేపట్టింది. ఈ ప్రాజెక్టులో భాగంగా భారతీయ వినియోగదారుల అవసరాలకు తగ్గట్టుగా, తక్కువ ధరలో, సంతృప్తికరమైన అనుభూతినిచ్చే వాహనాలను విడుదల చేయాలని నిర్ణయించుకుంది. తద్వారా తమ బ్రాండ్ వ్యాల్యూను భారత్లో విస్తరింపజేయాలని భావిస్తోంది.
మరో నాలుగు మోడళ్లు..
ప్రస్తుతం స్కోడా రెండు మోడళ్లనే భారత మార్కెట్లో విడుదల చేసింది. ఏడాదికల్లా ఇటీవలే అంతర్జాతీయ మార్కెట్లో విడుదల చేసిన ఎస్యూవీ కుషక్ సహా మరో నాలుగు మోడళ్లను విడుదల చేయాలని సన్నాహాలు చేస్తోంది. ఈ ఏడాది చివరినాటికి 150 డీలర్షిప్ కేంద్రాలను ఏర్పాటు చేయాలని భావిస్తోంది.
భారీగా పెట్టుబడులు..
భారత వాహన రంగంలో 5 శాతం మార్కెట్ విలువను సొంతం చేసుకోవాలని తాము లక్ష్యంగా పెట్టుకున్నామని స్కోడా ఆటో ఫోక్స్వ్యాగన్ భారత మేనేజింగ్ డైరెక్టర్ గురుప్రతాప్ బోపరాయ్ తెలిపారు. ఈ మేరకు ఫోక్స్వ్యాగన్ గ్రూప్ తమ సంస్థలో 1 బిలియన్ యూరోలను పెట్టుబడిగా పెడుతున్నట్లు చెప్పారు.
ఆ నాలుగు మోడళ్లు ఇవే..
రాబోయే సంవత్సరాల్లో ఏడాదికి లక్ష కార్ల చొప్పున విక్రయించాలని తాము లక్ష్యంగా పెట్టుకున్నామని స్కోడా ఆటో ఇండియా బ్రాండ్ డైరెక్టర్ జాక్ హోలిస్ తెలిపారు. తాము విడుదల చేయబోయే వివిధ మోడళ్ల గురించి వివరించారు.
"కుషక్ను ఈ ఏడాది జులైనాటికి అందుబాటులోకి తెస్తాం. ఏప్రిల్ చివరినాటికి ఆక్టావియా మోడల్ను విడుదల చేస్తాం. మూడో త్రైమాసికంలో బీఎస్-6 వెర్షన్తో కొడైక్ ఎస్యూవీని తీసుకువస్తాం. ఇండియా2.0 ప్రాజెక్టులో భాగంగా ఈ ఏడాది చివరినాటికి సెడాన్ మోడల్ను విడుదల చేస్తాం."
-జాక్ హోలిస్, స్కోడా ఆటో ఇండియా బ్రాండ్ డైరెక్టర్
తమ సంస్థను గతేడాది 65 డీలర్షిప్ కేంద్రాలతో స్థాపించామని, ఏడాది చివరినాటికి 100 అవుట్ లెట్లను నెలకొల్పామని జాక్ హోలిస్ చెప్పారు. ఈ ఏడాది చివరినాటికి ఆ సంఖ్యను 150కి పెంచుతామని పేర్కొన్నారు.
