ఫార్చూన్ బిజినెస్ పర్సన్ ఆఫ్ ది ఇయర్ 2020 జాబితాలో భారత సంతతికి చెందిన అడోబ్ సీఈఓ శంతను నారాయణ్, మాస్టర్ కార్డ్ సీఈఓ అజయ్ బంగా చోటు దక్కించుకున్నారు. టెస్లా సీఈఓ ఎలన్ మస్క్ మరోసారి అగ్రస్థానాన్ని సొంతం చేసుకున్నారు. మస్క్ వరుసగా రెండోసారి ఈ జాబితాలో తొలిస్థానంలో నిలవడం గమనార్హం.
కరోనా సంక్షోభం ఉన్నప్పటికీ ఇతర దిగ్గజ నాయకులు కూడా గణనీయ పనితీరు కనబరిచినట్లు ఫార్చూన్ తెలిపింది. ఈ జాబితాలో ఎనిమిదో స్థానంలో శంతను నారాయణ్ ఉన్నారు. ఆయన సారథ్యంలో అడోబ్ డిజైన్, పబ్లిషింగ్ టూల్స్ మరింత మందికి చేరువ కావడం కొనసాగిందని వెల్లడించింది. ప్రతికూల పరిస్థితుల్లోనూ కంపెనీ మూడో త్రైమాసికంలో 14 శాతం వృద్ధితో 3.3 బిలియన్ డాలర్ల ఆదాయాన్ని నమోదు చేసింది.
గత పదేళ్లుగా మాస్టర్ కార్డ్ సీఈఓగా వ్యవహరిస్తున్న అజయ్ బంగా.. ఫార్చూన్ జాబితాలో తొమ్మిదో స్థానంలో నిలిచారు. త్వరలోనే ఆయన పదవి నుంచి వైదొలగనున్నారు. 2021 జనవరి 1 నుంచి కొత్త సీఈఓగా మైకేల్ మైబాచ్ పనిచేయనున్నారు.
జాబితాలోని మరింత మంది..
ఫార్చూన్ 20 మంది జాబితాలో అడ్వాన్స్డ్ మైక్రో డివైసెస్ సీఈఓ లిసా సూ రెండో స్థానాన్ని సొంతం చేసుకున్నారు. నెట్ఫ్లిక్స్ సీఈఓ రీడ్ హ్యాస్టింగ్స్(4), ఫోర్టిస్క్యూ మెటల్ గ్రూప్ సీఈఓ ఎలిజబెత్ గైన్స్(5), అమెజాన్ సీఈఓ జెఫ్ బెజోస్(7), ఇంట్యూట్ సీఈఓ ససాన్ గూడార్జి(16) గా నిలిచారు.
