కరోనాపై పోరులో భాగంగా ప్రభుత్వానికి తమ వంతు సహాయం చేసేందుకు అపోలో హాస్పిటల్స్ గ్రూప్ ముందుకొచ్చింది. వ్యాక్సిన్ అందుబాటులోకి వచ్చిన అనంతరం.. రోజుకు 10 లక్షల డోసులను ప్రజలకు సురక్షితంగా అందించేందుకు సిద్ధంగా ఉన్నట్టు ప్రకటించింది.
తక్కువ సమయంలో ఎక్కువ మందికి వ్యాక్సిన్ లభించే విధంగా ప్రభుత్వంతో కలిసి పనిచేయనున్నట్టు సంస్థ ఎగ్జిక్యూటివ్ వైస్ ఛైర్మన్ శోభన కామినేని వెల్లడించారు. ఇందుకోసం ఫార్మసీలు, క్లినిక్స్, దేశవ్యాప్తంగా ఉన్న తమ ఆసుపత్రుల్లోని 10వేల మంది నిపుణులకు శిక్షణ ఇచ్చినట్టు తెలిపారు.
"దేశవ్యాప్తంగా అపోలో నెట్వర్క్ విస్తరించి ఉంది. దాదాపు 30 శాతం మంది ప్రజలు అపోలో కేంద్రానికి కేవలం 30 నిమిషాల దూరంలో ఉన్నారు. రోజుకు 10 లక్షల డోసులను అందించే సామర్థ్యం ప్రతి కేంద్రానికి ఉంది. ఈ మేరకు ప్రభుత్వ మార్గదర్శకాలతో వ్యాక్సిన్ను అందించేందుకు నిపుణులకు శిక్షణ ఇచ్చాం."
--- శోభన కామినేని, అపోలో గ్రూప్ ఎగ్జిక్యూటివ్ వైస్ ఛైర్మన్.
వ్యాక్సిన్ను ఉంచేందుకు కావాల్సిన శీతల గిడ్డంగి వ్యవస్థను బలోపేతం చేసినట్టు.. టీకాను సురక్షితంగా రవాణా చేసేందుకు అన్ని చర్యలు చేపట్టినట్టు శోభన వెల్లడించారు.
అపోలో హాస్పిటల్స్ గ్రూప్ ఆధ్వర్యంలో ప్రస్తుతం.. 19 ఔషధాల సరఫరా కేంద్రాలు, 70 ఆసుపత్రులు, 400 క్లినిక్లు, 500 కార్పొరేట్ హెల్త్ సెంటర్లు, 4,000 ఫార్మసీలతో పాటు అపోలో 24/7 డిజిటల్ ప్లాట్ఫాం ఉన్నాయి.
ఇదీ చూడండి:- కరోనా టీకా సింగిల్ డోస్.. కేవలం 75 రూపాయలు!
