చమురు ఉత్పత్తి పెంపునకు ఒపెక్​ దేశాల నిర్ణయం!

ఒపెక్​ దేశాలు కీలక నిర్ణయం తీసుకోనున్నట్లు తెలుస్తోంది. ధరలు కరోనా పూర్వ స్థితికి చేరినందున చమురు ఉత్పత్తిని పెంచాలని యోచిస్తున్నట్లు సమాచారం.

సౌదీ అరేబియా నేతృత్వంలోని ఒపెక్ దేశాలు ప్రపంచవ్యాప్తంగా చమురు ఉత్పత్తిని పెంచేందుకు యోచిస్తున్నాయి. చమురు ధరలు కరోనా పూర్వ స్థితికి చేరిన నేపథ్యంలో గురువారం ఆన్​లైన్​ వేదికగా జరిగే సమావేశంలో ఈ నిర్ణయం తీసుకోనున్నాయి. వైరస్​ కొత్త వేరియంట్​ వ్యాప్తి చమురు ఉత్పత్తి డిమాండ్​పై ప్రభావం చూపవని ఆయా దేశాలు భావిస్తున్నాయి.

రోజుకు 5 లక్షల బ్యారెళ్ల చమురు ఉత్పత్తిని పెంచుతూ గత డిసెంబర్​లో నిర్ణయం తీసుకున్న 'ఒపెక్ ప్లస్' దేశాలు.. మరో 5 లక్షల బ్యారెళ్ల మేర ఉత్పత్తిని పెంచే అవకాశం ఉందని విశ్లేషకులు చెబుతున్నారు. కానీ, సౌదీ అరేబియా రోజుకు 10 లక్షల బ్యారెళ్ల చమురు ఉత్పత్తిని తగ్గిస్తూ కీలక నిర్ణయం తీసుకుంటున్నట్లు జనవరిలో ప్రకటించింది. ఈ నేపథ్యంలో చమురు ధరలు విపరీతంగా పెరిగాయి. మరి ఈ నిర్ణయాన్ని సౌదీ అరేబియా వెనక్కితీసుకుంటుందా అనే దానిపై స్పష్టత రాలేదు.

ఇదీ చదవండి:ఎఫ్​డీఐల వెల్లువ- 9 నెలల్లో 40% వృద్ధి