పెట్రోలియం ఉత్పత్తులను వస్తు, సేవల పన్ను (జీఎస్టీ) పరిధిలోకి తీసుకురావాలని ఇంత వరకు ఏ రాష్ట్రం నుంచి కూడా ప్రతిపాదన రాలేదని కేంద్ర ఆర్థిక శాఖ సహాయ మంత్రి అనురాగ్ ఠాకూర్ తెలిపారు. లోక్ సభ ప్రశ్నోత్తరాల సమయంలో జేడీ(యూ) ఎంపీ రాజీవ్ రాజన్ సింగ్ అడిగిన ప్రశ్నకు సమాధానంగా ఈ విషయాన్ని వెల్లడించారు.
'వివిధ రాష్ట్రాల సూచనల ఆధారంగా జీఎస్టీ మండలి అజెండా సమావేశం నిర్వహిస్తారు. అయితే ఇంత వరకు ఏ ఒక్క రాష్ట్రం కూడా ఈ అంశాన్ని (పెట్రోలియం ఉత్పత్తులపై జీఎస్టీ విధింపు) సూచించలేదు.' అని ఠాకూర్ వివరించారు. తదుపరి జీఎస్టీ మండలి సమావేశంలో ఈ అంశంపై చర్చించేందుకు కేంద్రం సిద్ధంగా ఉందని తెలిపారు.
నిజానికి పెట్రోలియం ఉత్పత్తులపై జీఎస్టీ విధింపు అంశం దీర్ఘకాలంగా పెండింగ్లో ఉంది. ఇటీవల పెట్రోల్, డీజిల్ ధరలు రికార్డు స్థాయికి చేరిన నేపథ్యంలో ఈ అంశం మళ్లీ చర్చల్లో నిలిచింది.
పెరిగిన పెట్రోల్, డీజిల్ ధరలు తగ్గించేందుకు కేంద్రం, రాష్ట్రాలు రెండూ నిర్ణయం తీసుకోవాల్సిన అవసరముందన్నారు అనురాగ్ ఠాకూర్. రాష్ట్రాలు పెట్రోలియం ఉత్పత్తులపై పన్నులు తగ్గిస్తే.. తాము (కేంద్రం) కూడా సుంకాలు తగ్గించేందుకు ప్రయత్నిస్తామని చెప్పారు.
ఇవీ చదవండి:
