నీరవ్​ మోదీ ఎలా మోసం చేశారో తెలుసా...?

ఆర్థిక నేరగాడు నీరవ్​ మోదీని ఎట్టకేలకు లండన్​ పోలీసులు అరెస్టు చేశారు. ఇది ప్రభుత్వ విజయమని భాజపా చెబుతుంటే... లండన్​ పారిపోనిచ్చింది మీరుకాదా అన్నది విపక్షాల ప్రశ్న. రాజకీయ దుమారానికి కారణమైన నీరవ్​ ఎవరు? ఎందుకు లండన్​ పారిపోయారు? ప్రభుత్వం అతడికి చెందిన భవంతిని ఎందుకు కూల్చివేసింది?

ప్రతి రోజులానే ఆ రోజు ట్రేడింగ్​ ప్రారంభమైంది. కొద్దిసేపటికే పంజాబ్​ నేషనల్​ బ్యాంకు షేర్లు కుప్పకూలిపోయాయి. కారణం ముంబయిలోని బ్రాడీ హౌస్​ బ్రాంచ్​లో భారీ కుంభకోణం బయటపడటమే. ఈ కుంభకోణం విలువ అక్షరాల రూ.12,700 కోట్లు. చేసింది... ప్రముఖ వజ్రాలు వ్యాపారి నీరవ్​ మోదీ.

మోసం ఎలా జరిగింది:

⦁ ముడి వజ్రాల కొనుగోలుకు రుణం కావాలని పంజాబ్​ నేషనల్​ బ్యాంకును ఆశ్రయించారు నీరవ్​ మోదీ. ఆయన అభ్యర్థనను పరిగణనలోకి తీసుకున్న బ్యాంకులు విదేశాల్లో చెల్లింపులు జరిపేలా లెటర్​ ఆఫ్​ అండర్ టేకింగ్​ (ఎల్​ఓయూ), ఫారిన్​ లెటర్​ ఆఫ్​ క్రెడిట్​ జారీ చేశాయి.

⦁ బ్యాంకు ఉద్యోగులు ఇక్కడే అక్రమాలకు పాల్పడ్డారు. అడ్డదారిలో ఎల్ఓయూలు జారీ చేశారు. ​వీటిపై విదేశాల్లో ఉన్న భారతీయ బ్యాంకులకు ఎలాంటి అనుమానం రాలేదు. ఎల్​ఓయూలు ఆధారంగా ముడి సరకు కొనుగోలుకు నిధులు మంజూరు చేశాయి.

⦁ తరువాత పంజాబ్​ నేషనల్​ బ్యాంకు అధికారులు ఇంటర్​ మెసేజింగ్ వ్యవస్థను దుర్వినియోగం చేశారు. విదేశాల్లోని భారతీయ బ్యాంకులు దీని గుర్తించకుండా పీఎన్​బీకి అడిగిన రుణాన్ని ఇచ్చాయి. ఈ సొమ్మును ముడి వజ్రాలు సరఫరా చేసిన వారి ఖాతాల్లోకి జమ చేశారు పంజాబ్​ నేషనల్​ బ్యాంకు అధికారులు. నీరవ్​ మోదీ వజ్రాలు పొందారు. ఈ మొత్తం వ్యవహారంలో కొందరు పీఎన్​బీ అధికారులకు ముడుపులు ముట్టినట్లు సీబీఐ విచారణలో తేలింది.

⦁ ఈ తంతు జరిగి ఏడేళ్లయినా ఎవ్వరికీ అనుమానం రాలేదు. బదిలీలతో కొత్తగా ఆ స్థానంలోకి వచ్చిన అధికారులు ఈ మోసాలను గుర్తించి, పైఅధికారులకు సమాచారం చేరవేశారు. అలా... భారీ కుంభకోణం వెలుగులోకి వచ్చింది.

⦁ మొదట రూ. 11,400 కోట్ల కుంభకోణం జరిగిందని భావించారు. తరువాత మరిన్ని నిజాలు వెలుగులోకి వచ్చాయి. మోసం విలువ రూ.12,700 కోట్లని తేలింది.

పీఎన్​బీకి కోలుకోలేని దెబ్బ:

కుంభకోణం బయటపడగానే స్టాక్​ మార్కెట్లో బ్యాంకు షేర్​ విలువ దారుణంగా పడిపోయింది. అప్పటివరకు రూ. 55,370 కోట్లగా ఉన్న పంజాబ్​ నేషనల్​ బ్యాంకు నిరర్థక ఆస్తుల విలువ రూ.86,620 కోట్లకు పెరిగింది.

ఇప్పుడిప్పుడే గాడిలోకి:

నీరవ్​ మోదీ కుంభకోణంతో నష్టాల ఊబిలో కూరుకుపోయిన పంజాబ్​ నేషనల్​ బ్యాంకు తిరిగి కోలుకోవటం కష్టమేనని, దానిని ఏదో ఒక బ్యాంకులో వీలినం చేయాలని చాలా మంది ఆర్థిక నిపుణులు సూచించారు. ఆ బ్యాంకు ఉద్యోగుల నిబద్ధత, అధికారుల ప్రణాళికలతో పీఎన్​బీ తిరిగి గాడిలో పెడింది. 2019 ఫిబ్రవరి నాటికి పంజాబ్​ నేషనల్​ బ్యాంకు రూ.230 కోట్ల లాభం ప్రకటించింది. గత సంవత్సరం ఇదే సమయానికి బ్యాంకు భారీ నష్టాల్లో ఉండటం గమనార్హం.