ఇండిగో సర్వర్ డౌన్​​... ప్రయాణికులకు తప్పని ఇక్కట్లు

ఇండిగో ఎయిర్​లైన్స్​ సర్వర్​ వ్యవస్థ స్తంభించింది. సాంకేతిక లోపంతో దేశవ్యాప్తంగా విమానాశ్రయాల్లో వేలాది మంది ప్రయాణికులు ఇబ్బందులు ఎదుర్కొంటున్నారు. గంటల తరబడి క్యూలో నిల్చోవాల్సి వస్తోంది. వీలైనంత వేగంగా సమస్యను పరిష్కరిస్తామని సంస్థ ఓ ప్రకటన విడుదల చేసింది.

దేశీయ చౌక విమానయాన సంస్థ ఇండిగో ఎయిర్​లైన్స్​ సర్వర్​ మొరాయించింది. నెట్​వర్క్​లో సాంకేతిక లోపంతో సేవలు నిలిచిపోయాయి. ఈ రోజు ఉదయం నుంచి ఈ పరిస్థితి తలెత్తిందని.. దీని పట్ల ప్రయాణికులకు కలిగిన అసౌకర్యానికి చింతిస్తున్నట్లు ఒక ప్రకటన విడుదల చేసింది.

అన్ని విమానశ్రయాలపై దీని ప్రభావం పడుతుందని.. ఇండిగో తెలిపింది. సాధ్యమైనంత త్వరలో ఈ సమస్యను పరిష్కరిస్తామని స్పష్టం చేసింది. ఏదైనా సహాయం, సమాచారం కోసం.. తమ కస్టమర్​ కేర్​, సామాజిక మాధ్యమాల హ్యాండిళ్లను సంప్రదించవచ్చని వెల్లడించింది.