దేశంలో కొన్ని రోజులుగా చైనా వస్తువులపై వ్యతిరేకత వ్యక్తమవుతోంది. సరిహద్దు వెంట చైనాతో నెలకొన్న ఉద్రిక్తతల నేపథ్యంలో దీనికి మరింత మద్దతు పెరిగింది. ఈ పరిణామం స్వదేశీ సంస్థలకు కలిసొచ్చే అంశమే అయినా.. అన్ని రంగాల్లో చూస్తే ఇది పెద్దగా అనుకూలమేమీ కాకపోవచ్చు అంటున్నారు నిపుణులు.
చైనా వస్తువులపై వ్యతిరేకత వల్ల దేశీయ స్మార్ట్ఫోన్ తయారీ కంపెనీలకు కలిసొస్తుందని చాలామంది భావిస్తున్నారు. అయితే ఈ అంశంపై దేశీయ స్మార్ట్ఫోన్ తయారీ సంస్థల వాదన మాత్రం మరోలా ఉంది.
నిధుల కొరత..
"ప్రారంభంలో ఈ పరిణామాలు ఉత్సాహం కలిగిస్తాయి. అయితే భారీగా నిధులున్న చైనా సంస్థలను ఎదుర్కోవాలంటే.. భారతీయ స్మార్ట్ఫోన్ తయారీ సంస్థలకు లో-కాస్ట్ ఫండ్స్ కావాలి." అని కార్బన్ మాతృసంస్థ జైనా గ్రూప్ ఎగ్జిక్యూటివ్ డైరెక్టర్ అభిషేక్ గార్గ్ అభిప్రాయపడ్డారు. లేదంటే ఆ సంస్థలకు పోటీ ఇవ్వడం కష్టమైన పనేనని చెప్పారు. ప్రభుత్వం జోక్యం చేసుకుని.. సరైన ప్రణాళికతో ముందుకు సాగితేనే దేశీయ బ్రాండ్లు పుంజుకుంటాయని ఆశాభావం వ్యక్తం చేశారు.
చైనా కంపెనీల రాకతో గత కొన్నాళ్లుగా దేశీయ సంస్థలు భారీగా కుదేలయ్యాయి. మరికొన్ని సంస్థలు విదేశీ కంపెనీలకు విడి భాగాల సరఫరదారులుగా నిలిచిపోయాయని ఆయన గుర్తు చేశారు.
తాత్కాలిక సెంటిమెంట్..
ప్రజల్లో చైనాపై, ఆ దేశ వస్తువులపై నెలకొన్న వ్యతిరేకత తమ వ్యాపారాలకు పెద్దగా లాభించక పోవచ్చని వెల్లడించింది మరో దేశీయ స్మార్ట్ఫోన్ల తయారీ సంస్థ లావా ఇంటర్నేషనల్. మనం స్వతహాగా వృద్ధి చెందాలని చెప్పింది. మన నైపుణ్యాలు, సామర్థ్యాలు పెంచుకుంటేనే చైనా కంపెనీలను ఎదుర్కోగలమని.. మార్కెట్ కూడా ఇందులో ముఖ్యమైందని వివరించింది.
"చైనాపై వ్యతిరేకత వంటి తాత్కాలిక సెంటిమెంట్లు కొన్ని రోజుల్లో మాయమైపోతాయి. అప్పుడు ప్రత్యర్థి సంస్థలకు.. బలమైన ఉత్పత్తులను తీసుకురావడం ద్వారానే పోటీ ఇవ్వగలం" అని స్పష్టం చేసింది.
మార్కెట్ వివరాల ప్రకారం మైక్రోమ్యాక్స్, లావా, కార్బన్ వంటి సంస్థలు త్వరలో తమ కొత్త ఉత్పత్తులను మార్కెట్లోకి విడుదల చేయనున్నాయి.
ఇదీ చూడండి:హెటిరో 'కరోనా మందు' ధర రూ.5,400
