ప్రపంచంలో అత్యంత స్వచ్ఛమైన 'యూరో-6' ప్రమాణాలతో కూడిన పెట్రోల్, డీజిల్ను ఏప్రిల్ 1 నుంచి సరఫరా చేయనుంది భారత్. యూరో-4 ఉద్గార గ్రేడ్ నుంచి యూరో-6కు భారత్ రూపాంతరం చెందనుంది. మూడేళ్లలో ఈ ఘనత సాధించిన తొలి పెద్ద ఆర్థిక వ్యవస్థగా భారత్ నిలువనుంది.
ప్రపంచంలో ఇంధన ఉద్గార స్థాయిలను యూరోలతో కొలుస్తారు. దేశంలో మాత్రం భారత్ స్టేజ్(బీఎస్)గా పిలుస్తాం. ప్రస్తుతం దేశంలో బీఎస్-4(యూరో-4) స్థాయి ఇంధనాలు సరఫరా అవుతున్నాయి. త్వరలోనే కాలుష్యం తక్కువగా వెలువరించే బీఎస్-6 స్థాయి పెట్రోల్, డీజిల్ను అన్ని చమురు సంస్థలు సరఫరా చేయనున్నాయి.
"దేశంలోని అన్ని రిఫైనరీ సంస్థలు చాలా తక్కువ సల్ఫర్ను విడుదల చేసే బీఎస్-6 పెట్రోల్, డీజిల్ను ఉత్పత్తి చేయటం 2019 చివర్లోనే ప్రారంభించాయి. దేశంలో స్వచ్ఛమైన పెట్రోల్ను సరఫరా అందుబాటులోకి రానుంది. ఇప్పటికే గిడ్డంగులకు కొత్త ఇంధనాన్ని పంపించాం. ఏప్రిల్ 1 నుంచి అన్ని బంకుల్లో స్వచ్ఛమైన పెట్రోల్, డీజిల్ లభిస్తాయి."
- సంజీవ్ సింగ్, ఇండియన్ ఆయిల్ కార్పొరేషన్ ఛైర్మన్
భారత్ 2010లో బీఎస్-3 ప్రమాణాలు ఉన్న ఇంధనాన్ని ఉత్పత్తి చేసింది. ఇందులో 350 పీపీఎం సల్ఫర్ సమ్మేళనం ఉంటుంది. అక్కడ నుంచి 50 పీపీఎం సల్ఫర్ వెలువడే బీఎస్-4కు మారటానికి ఏడేళ్లు పట్టింది. 10 పీపీఎం సల్ఫర్ను వెలువరించే బీఎస్-6 ఇంధనాన్ని సరఫరా చేసేందుకు మూడేళ్లు మాత్రమే పట్టడం విశేషం. సీఎన్జీ తరహాలో అతి తక్కువ కాలుష్యాన్ని వెలువరిస్తుంది ఈ రకమైన ఇంధనం.
1990 నుంచి ఇంధన స్వచ్ఛతలో మార్పులు తీసుకొస్తుంది భారత్.
బీఎస్-6 ప్రమాణాలతో కూడిన ఇంధనాన్ని ఉత్పత్తి చేసేందుకు చమురు సంస్థలు సుమారు రూ.35 వేల కోట్లు ఖర్చు చేశాయి. ఇప్పటికే దిల్లీ సహా చుట్టుపక్కల ప్రాంతాల్లో బీఎస్-6 ఇంధనాన్ని సరఫరా చేస్తున్నాయి చమురు సంస్థలు.
