హైదరాబాద్లో కొత్త ఇళ్ల నిర్మాణం, అమ్మకాలు గణనీయంగా పెరిగినట్లు స్థిరాస్తి కన్సల్టెంట్ సంస్థ నైట్ ఫ్రాంక్ ఇండియా నివేదిక పేర్కొంది. ఈ ఏడాది జనవరి-జూన్ నెలల్లో 16,712 కొత్త ఇళ్లు/ఫ్లాట్ల నిర్మాణం ప్రారంభం కాగా, 11,974 ఇళ్లు/ఫ్లాట్ల అమ్మకాలు జరిగాయని తెలిపింది. గత ఏడాది ఇదేకాలంలో 4,422 కొత్త ఇళ్ల నిర్మాణం ప్రారంభమవగా, ఈసారి 278 శాతం అధికమయ్యాయని, అప్పుడు 4,782 ఇళ్లు అమ్ముడుపోగా, ఈసారి 150 శాతం వృద్ధి నమోదైనట్లు పేర్కొంది.
అమ్మకానికి సిద్ధంగా ఉన్న ఇళ్లు/ఫ్లాట్ల సంఖ్య కూడా ఏడాది వ్యవధిలో 4,037 నుంచి 11,918 కి పెరిగింది. ఇతర ప్రాంతాలతో పోల్చితే హైదరాబాద్ పశ్చిమ ప్రాంతంలో (కూకట్‌పల్లి, మాదాపూర్‌, కొండాపూర్‌, గచ్చిబౌలి, రాయదుర్గం, కోకాపేట) నివాస గృహాల నిర్మాణం, అమ్మకాలు అధికంగా జరుగుతున్నాయని ఈ నివేదిక విశ్లేషించింది.
ముంబయి- మెట్రోపాలిటన్‌ ప్రాంతం, దిల్లీ- ఎన్‌సీఆర్‌, కోల్‌కతా, చెన్నై, బెంగళూరు, హైదరాబాద్, పుణె, అహ్మదాబాద్‌ నగరాలన్నింటిలో కలిపి జనవరి-జూన్ అమ్మకాలు ఏడాదిక్రితం నాటి 59,538 యూనిట్లతో పోలిస్తే 67 శాతం పెరిగి 99,416 యూనిట్లుగా నమోదయ్యాయి.
ఇదీ చదవండి:హోం లోన్ అప్లికేషన్ రిజక్ట్ అయ్యిందా?
