జూన్ 14న జీఎస్టీ మండలి సమావేశం కానుంది. దేశంలో కరోనా వైరస్ విజృంభణ తర్వాత మండలి సమావేశం కావటం ఇదే తొలిసారి. ఈ భేటీ వీడియో కాన్ఫరెన్స్ ద్వారా జరగనున్నట్లు అధికారులు తెలిపారు. కేంద్ర ఆర్థికశాఖ మంత్రి నిర్మలా సీతారామన్ నేతృత్వం వహించే ఈ సమావేశానికి కేంద్ర పాలిత ప్రాంతాలతో సహా అన్ని రాష్ట్రాల ప్రతినిధులు హాజరుకానున్నారు.
దేశవ్యాప్త లాక్డౌన్ కారణంగా ఆదాయ మార్గాలు బాగా సన్నగిల్లిన తరుణంలో జీఎస్టీ రేట్లను పెంచేందుకు కేంద్ర ఆర్థిక మంత్రి సుముఖంగా లేనట్లు తెలుస్తోంది. అత్యవసరం కాని వస్తువులపై జీఎస్టీని పెంచితే.. దాని ప్రభావం డిమాండ్పై పడుతుందని, తద్వారా ఆర్థిక వ్యవస్థ పునరుద్ధరణకు ఆటంకం కలుగుతుందనే భావనలో మంత్రి ఉన్నట్లు అధికారులు తెలిపారు. లాక్డౌన్ అనంతరం ఆర్థిక వ్యవస్థ పరుగులు పెట్టే దిశగా అడుగులు వేయాలని సూచించినట్లు పేర్కొన్నారు.
జూన్ 14న జరిగే 40వ జీఎస్టీ మండలి సమావేశంలో ఈ విషయంపై తుది నిర్ణయం తీసుకోనున్నట్లు అధికారిక వర్గాల సమాచారం. ప్రస్తుత సంక్షోభం కారణంగా విపత్తు సెస్ను కూడా ప్రవేశ పెడితే.. అది ప్రతికూలంగా మారుతుందని భావిస్తున్నట్లు తెలుస్తోంది.
ఇదీ చూడండి:11 అంకెల మొబైల్ నంబర్లపై ట్రాయ్ క్లారిటీ
