కొద్ది రోజుల క్రితం వెలుగుచూసిన టెలివిజన్ రేటింగ్ పాయింట్స్ (టీఆర్పీ) కుంభకోణంలో బ్రాడ్కాస్ట్ ఆడియన్స్ రీసెర్చ్ కౌన్సిల్(బార్క్) మాజీ సీఈఓను అరెస్టు చేశారు ముంబయి క్రైం బ్రాంచ్ పోలీసులు. పార్థో దాస్గుప్తాను పుణెలో అదుపులోకి తీసుకున్నట్లు తెలిపారు. ఆయనను శుక్రవారం.. కోర్టు ముందు హాజరుపర్చనున్నట్లు వెల్లడించారు. ఈ కేసును విచారిస్తున్న క్రైం ఇంటెలిజెన్స్ యూనిట్.. ఇప్పటివరకు ఈ కేసుకు సంబంధించి 15 మందిని అరెస్టు చేసింది. ఇందులో బార్క్ చీఫ్ ఆపరేటింగ్ ఆఫీసర్(సీఓఓ) రమిల్ రామ్గర్హియా సహా రిపబ్లిక్ టీవీ సీఈఓ వికాస్ ఖంచందాని ఉన్నారు.
టీఆర్పీల కోసం కొన్ని ఛానళ్లు మోసాలకు పాల్పడుతున్నాయంటూ బార్క్.. పలు మీడియా సంస్థలపై ఇచ్చిన ఫిర్యాదు మేరకు పోలీసులు దర్యాప్తు ప్రారంభించారు. టీఆర్పీలు పెంచుకోవటానికి కొన్ని కుటుంబాలకు డబ్బులు ఇచ్చి మరీ.. తమ ఛానళ్లను చూసేలా మీడియా సంస్థలు చేస్తున్నాయంటూ బార్క్ ఆరోపిస్తోంది.
ఇదీ చూడండి: టీఆర్పీ స్కామ్ బట్టబయలు- 3 ఛానళ్లపై కేసులు
