ఏప్రిల్ 1న ప్రారంభమైన ప్రస్తుత (2020-21) ఆర్థిక సంవత్సరంలో భారత ఆర్థిక వృద్ధి అంచనాలను 2 శాతానికి తగ్గించింది ఫిచ్ రేటింగ్స్ సంస్థ. ఆర్థిక వ్యవస్థను సరళీకృతం చేసిన దగ్గర నుంచి 30 ఏళ్లలో ఇదే అత్యల్పం అని పేర్కొంది.
కరోనా కారణంగా.. ప్రముఖ అంతర్జాతీయ రేటింగ్ సంస్థలు వరుసగా వృద్ధి రేటు అంచనాలను కుదిస్తూ వస్తున్నాయి. తాజాగా ఫిచ్ కూడా అదే నొక్కిచొప్పింది. ప్రస్తుత ఆర్థిక సంవత్సరంలో ఆర్థిక మాంద్యం తలెత్తుతుందని అభిప్రాయపడింది.
వైరస్ తాకిడికి వినియోగదారుల వ్యయాలు తగ్గిన నేపథ్యంలో.. సూక్ష్మ, చిన్న, మధ్య తరహా పరిశ్రమలు ఎక్కువగా నష్టపోయే జాబితాలో ఉన్నాయని అభిప్రాయపడింది ఫిచ్ రేటింగ్స్.
మిగతావి ఏమంటున్నాయ్...?
ఆసియా అభివృద్ధి బ్యాంకు(ఏడీబీ) కూడా ప్రస్తుత ఆర్థిక సంవత్సరంలో భారత ఆర్థిక వృద్ధి 4 శాతానికి పరిమితమవుతుందని ఇవాళ పేర్కొంది. ప్రపంచవ్యాప్త రాబడిలో దాదాపు 5 శాతం(4.1 ట్రిలియన్ డాలర్లు) తగ్గనుందని విశ్లేషించింది.
ఎస్ అండ్ పీ గ్లోబల్ రేటింగ్స్.. వృద్ధి రేటును 3.5 శాతానికి కుదించింది. అంతకుముందు.. 5.2 శాతంగా నమోదవుతుందని అంచనా వేయడం గమనార్హం.
దేశీయ క్రెడిట్ రేటింగ్ ఏజెన్సీ ఇండియా రేటింగ్స్ కూడా తమ అంచనాల్ని ఇటీవల సవరించింది. ఆర్థిక వృద్ధిని 5.5 నుంచి 3.6 శాతానికి పరిమితం చేసింది.
మూడీస్ భారీగా.....
మూడీస్ ఇన్వెస్టర్స్ సర్వీస్ కూడా మిగతా వాటి బాటలోనే పయనించింది. మూడీస్ ప్రకారం.. ప్రస్తుత ఆర్థిక సంవత్సరం జీడీపీ వృద్ధి రేటు 2.5 శాతమే. అంతకముందు 5.3 శాతంగా అంచనా వేసింది. కొవిడ్-19 మహమ్మారి ప్రభావం ప్రపంచ ఆర్థిక వ్యవస్థపై కోలుకోలేని దెబ్బ కొట్టిందని అభిప్రాయపడింది.
మార్చి 31తో ముగిసిన క్రితం ( 2019-20) ఆర్థిక సంవత్సరంలో అంచనా వేసిన 5 శాతం వృద్ధి రేటుతో పోల్చి... తాజా వృద్ధి అంచనాలను వెలువరించాయి రేటింగ్ సంస్థలు.
దేశవ్యాప్తంగా 21 రోజుల లాక్డౌన్ కొనసాగుతోంది. ఈ నేపథ్యంలో.. ప్రైవేట్‌ వినియోగంతో పాటు పెట్టుబడులూ తగ్గిపోయాయి. తాజా పరిణామాలన్నింటి నడుమ భారత వృద్ధి రేటును సవరించినట్లు ఆయా సంస్థలు పేర్కొన్నాయి.
