ఆర్థికమంత్రి నిర్మలా సీతారామన్ ఆత్మ నిర్భర్ భారత్ అభియాన్ మూడో విడత ప్యాకేజీలో వ్యవసాయం, అనుబంధ రంగాలైన మత్స్య, పశువర్ధక, డెయిరీ పరిశ్రమలకు పెద్దపీట వేశారు. వ్యవసాయ రంగానికి సంబంధించి 11 అంశాలపై ప్రత్యేక దృష్టి కేంద్రీకరించినట్లు ఆమె తెలిపారు. వీటిలో 8 మౌలిక సదుపాయాలు, నిల్వ సామర్థ్యం పెంపునకు... 3 పరిపాలనా పరమైన సంస్కరణలకు సంబంధించినవి అని ఆమె స్పష్టం చేశారు.
రైతులకు భరోసా...
వ్యవసాయ రంగ మౌలిక సదుపాయాల అభివృద్ధికి రూ.లక్ష కోట్లు కేటాయిస్తున్నట్లు నిర్మలా సీతారామన్ ప్రకటించారు. పంట ఉత్పత్తుల నిల్వ, కోతలు, ఆధునీకరణ సాంకేతిక పరిజ్ఞానం కోసం ఈ నిధులు వెచ్చించనున్నట్లు స్పష్టం చేశారు. పీఎం కిసాన్ సమ్మాన్ నిధి నుంచి రైతులకు రూ.18,700 కోట్లు బదిలీ చేసినట్లు ఆమె తెలిపారు.
గడచిన రెండు నెలల్లో ఫసల్ బీమా యోజన కింద రైతులకు రూ.6,4000 కోట్ల పరిహారం అందజేసినట్లు నిర్మలా సీతారామన్ పేర్కొన్నారు. రూ.74,300 కోట్ల మేర కనీస మద్దతు ధర ఇచ్చి ఆహార ధాన్యాల కొనుగోలు చేసినట్లు తెలిపారు.
డెయిరీ రంగానికి
లాక్డౌన్ వేళ సంక్షోభం ఎదుర్కొన్న పాల సేకరణ రంగానికి చేయూతనందించినట్లు నిర్మలా సీతారామన్ పేర్కొన్నారు. మిగులు పాలను సహకార డెయిరీల ద్వారా సేకరించామని... ఫలితంగా రూ.4,100 కోట్ల మేర రైతులకు ప్రయోజనం చేకూరిందని ఆమె తెలిపారు. అలాగే 2 కోట్ల మంది పాడిరైతులకు రూ.5 వేల కోట్ల మేర ప్రోత్సాహకాలు అందించామన్నారు. సహకార రంగాల్లోని డెయిరీలకు 2 శాతం వడ్డీ రాయితీ కల్పించినట్లు ఆర్థికమంత్రి పేర్కొన్నారు.
గడువు తీరిన 242 ఆక్వా హేచరీస్లకు రిజిస్ట్రేషన్ గడువు 3 నెలల పాటు పొడిగిస్తున్నట్లు నిర్మలా సీతారామన్ తెలిపారు.
