ఫుడ్ కార్పొరేషన్ ఆఫ్ ఇండియా (ఎఫ్సీఐ) బుధవారం రికార్డు స్థాయిలో 2.8 లక్షల టన్నుల ఆహార ధాన్యాలను వివిధ రాష్ట్రాలకు రవాణా చేసింది. ఆయా రాష్ట్రాలు రేషన్ షాపుల ద్వారా ఈ ఆహార ధాన్యాలను ప్రజలకు సరఫరా చేయనున్నాయి. లాక్డౌన్ వేళ ప్రజల ఆహార అవసరాలను తీర్చేందుకు ఇది ఇతోధికంగా దోహదం చేస్తుంది.
"ఎఫ్సీఐ ఏప్రిల్ 22న... 102 రైళ్లలో 2.8 లక్షల టన్నుల ఆహార ధాన్యాలను ఆయా రాష్ట్రాలకు రవాణా చేసి సరికొత్త రికార్డు సృష్టించింది."
- కేంద్ర ఆహార మంత్రిత్వ శాఖ
ఏయే రాష్ట్రాలకు ఎంతెంత?
ఎఫ్సీఐ ఆహార ధాన్యాలతో పంపించిన 102 రైళ్లలో... గరిష్ఠంగా పంజాబ్కు 46, తెలంగాణకు 18 కేటాయించారు.
"గోధుమ, ముడి బియ్యాన్ని పంజాబ్, హరియాణాల నుంచి దేశంలోని వివిధ ప్రాంతాలకు తరలించారు. ఉడికించిన బియ్యాన్ని తెలంగాణ నుంచి కేరళ, తమిళనాడు, బంగాల్కు తరలించారు."
- కేంద్ర ఆహార మంత్రిత్వ శాఖ
భారీ స్థాయిలో...
తాజాగా సరఫరా చేసిన ఆహార ధాన్యాలతో కలిపి... లాక్డౌన్ కాలంలో ఎఫ్సీఐ రవాణా చేసిన మొత్తం ఆహార ధాన్యాలు 50 లక్షల టన్నులు దాటాయి. రోజువారీ సగటు 1.65 లక్షల టన్నులు.
అదే సమయంలో ఎఫ్సీఐ 4.6 మిలియన్ టన్నుల ఆహార ధాన్యాల నిల్వలను అన్లోడ్ చేసి.. 9.8 మిలియన్ టన్నులను రాష్ట్ర ప్రభుత్వాలకు వివిధ పథకాల కింద (ప్రధానమంత్రి గరీబ్ కల్యాణ అన్న యోజన సహా) పంపిణీ చేసింది.
పీఎంజీకేవై పథకం కింద ఎఫ్సీఐ ఇప్పటికే 80 కోట్ల మంది లబ్ధిదారులకు పంపిణీ చేసేందుకు 4.23 మిలియన్ టన్నుల ఆహార ధాన్యాలను రాష్ట్ర ప్రభుత్వాలకు అందజేసింది. ఫలితంగా ప్రతి ఒక్క లబ్ధిదారుడికి 5 కిలోల రేషన్ మూడు నెలల పాటు ఉచితంగా లభిస్తుంది.
రాయితీ ధరతో..
కేంద్ర ప్రభుత్వం 'జాతీయ ఆహార భద్రతా చట్టం' (ఎన్ఎఫ్ఎస్ఏ) కింద ఒక వ్యక్తికి ఒక నెలకు 5 కిలోల ఆహార ధాన్యాలను అధిక రాయితీ ధరతో అంటే కిలోకు 2-3 రూపాయలకు అందిస్తోంది.
గోధుమల సేకరణ
ఎఫ్సీఐ ఏప్రిల్ 22 వరకు మొత్తం 3.38 మిలియన్ టన్నుల గోధుమలు సేకరించింది. వీటిలో పంజాబ్ ఒక్కటే 2.15 మిలియన్ టన్నుల వరకు అందించింది. ఈ సీజన్లో గోధుమ సేకరణ లక్ష్యం 40 మిలియన్ టన్నులు.
ఇదీ చూడండి: ముంబయిలో ఒక్కరోజే 478 కరోనా కేసులు.. 8 మరణాలు
