ఈ యాప్తో లావాదేవీలు చేస్తే మీకు 50 శాతం క్యాష్ బ్యాక్.. ఈ యాప్తో డబ్బు చెల్లించండి 1000 రూపాయిల వరకు నగదు పొందే అవకాశం... ఈ యాప్ ద్వారా మీ బిల్లులు చెల్లిస్తే మీరు సగం మాత్రమే చెల్లించొచ్చు..
ఇలాంటి ప్రకటనలు తరచూ అంతర్జాలంలో చూస్తునే ఉంటాం. డిజిటల్ లావాదేవీలు మంచిదే కానీ ఇటీవల వస్తున్న నకిలీ యాప్లతో నష్టపోతున్నారు చాలామంది. కష్టపడి రూపాయి... రూపాయి కూడబెట్టిన సొమ్మును ఒక్క క్లిక్తో దోచేస్తున్నాయి దొంగ యాప్లు.
గుగూల్ ప్లేస్టోర్లో లెక్కలేనన్ని ఈ-వాలెట్స్ ఉన్నాయి. వీటిలో నకిలివే అధికం. సరైన జాగ్రత్తలు పాటించకుండా వీటిని వినియోగిస్తే ఖాతాల్లో సొమ్ము క్షణాల్లో మాయమవుతుంది.
1.డిజిటల్ ఏటీఎం:
'డిజిటల్ భారత్' అని ప్రధాని మోదీ ప్రకటించగానే గుగూల్ ప్లే స్టోర్లో వాలిపోయాయి నకీలీ యాప్లు. ఇందులో డిజిటల్ ఏటీఎం ఒకటి. ఇది ఇన్స్టాల్ చేసుకునే సమయంలో యూజర్ నేమ్, పాస్వర్డ్తో సహా ఇతర బ్యాంకు వివరాలు అడుగుతోంది. ఇవి నమోదు చేశారంటే అంతే బ్యాంకు ఖాతాలో సొమ్ము స్వాహా అయిపోతుంది.
ఈ యాప్కి వీరు ప్రధాని మోదీ, ఆర్బీఐ బ్యాంకుల చిత్రాలు వాడటం గమనార్హం.
2.ఎనీడెస్క్:
సైబర్ నేరగాళ్లకు ఎంతో ఇష్టమైన యాప్ ఎనీడెస్క్. ఘరానా దొంగలు దీనిని సులభంగా హ్యాక్ చేస్తున్నారు. వినియోగదారుల ఖాతాల వివరాలు, ఫోన్ నెంబర్లు సేకరించి డబ్బులు తస్కరిస్తున్నారు. ఈ మేరకు ఆర్బీఐ ఐటీ విభాగం ప్రకటన విడుదల చేసింది.
ఇవి మచ్చుకు కొన్ని మాత్రమే. చెప్పుకుంటూ పోతే ఇంకా చాలా ఉన్నాయి.
మరి ఏవి వాడాలి:
1. కేవలం బ్యాంకులు, రిజర్వ్ బ్యాంకు గుర్తించిన యాప్లు మాత్రమే వినియోగించాలి.
2.నిజమైన యాప్లైతే వార్తా పత్రికల్లోనూ, టెలివిజన్ ద్వారా ప్రకటనలిస్తాయి. వీటిని మాత్రమే ఇన్స్టాల్ చేసుకోవాలి.
3.కొన్ని యాప్లు ఆచరణకు సాధ్యం కాని ఆఫర్లు ప్రకటిస్తుంటాయి. వీటి పట్ల జాగ్రత్తగా వ్యవహరించాలి.
నకిలీవీ గుర్తించడం ఎలా..?
1. గుగూల్ ప్లేస్టోర్ నుంచి యాప్ ఇన్స్టాల్ చేసుకునేముందు దాని రేటింగ్ చూడాలి. నకిలీ యాప్లకు రేటింగ్ చాలా తక్కువుగా ఉంటుంది.
2.అసలైన యాప్లో ప్రకటనలు చాలా తక్కువగా ఉంటాయి. ప్రకటనలు ఎక్కువవగా వస్తుంటే అది నకిలీదయ్యే అవకాశముంది.
3.యాప్ ఇన్స్టాల్ చేసుకునేముందు అన్ని నిబంధనలు జాగ్రత్తగా చదవండి.
4. యాప్ సంబంధిత సమాచారాన్ని గుగూల్లో తెలుసుకోవడంతో పాటు, ఇది ఇన్స్టాల్ చేసుకోవడం మంచిదేనా అని గుగూల్లో శోధిస్తే యాప్ గురించి కచ్చితమైన సమాచారం వస్తుంది.
