"కరోనా నుంచి రక్షించే మాస్క్ ఇదే... స్టాక్ చాలా తక్కువ ఉంది... వెంటనే త్వరపడండి"... ఇలాంటి యాడ్లు ఆన్లైన్లో ఎక్కడో చోట చూసే ఉంటారు. ప్రపంచాన్ని గడగడలాడిస్తున్న కరోనా వైరస్ను బూచిగా చూపి, వ్యాపారం పెంచుకునేందుకు ఇలాంటి తప్పుడు యాడ్లు ఇస్తున్నారు కొందరు. అలాంటి మోసపూరిత ప్రకటనలపై నిషేధం విధించింది ఫేస్బుక్.
వైరస్ వ్యాప్తిని అరికట్టేందుకు ఉపకరించే ఉత్పత్తులని చెప్పే ప్రకటనలనూ నిషేధిస్తున్నట్లు ప్రకటించింది ఫేస్బుక్. ఉదాహరణకు... "కరోనా నుంచి 100శాతం రక్షణ ఇచ్చే మాస్క్" అనే యాడ్లనూ ఇవ్వడం లేదని వివరించింది.
బ్లీచింగ్ కలిపిన నీరు తాగితేనో, ఫలానా ఉత్పత్తి వాడితేనో కరోనా రాదని చెప్పే అశాస్త్రీయ యాడ్లు, పోస్ట్లను ఇప్పటికే నిషేధించింది ఫేస్బుక్. కరోనా వచ్చినా... ప్రజలు, వైద్యులను సంప్రదించకుండా ప్రమాదం బారిన పడే అవకాశం ఉన్నందునే ఈ నిర్ణయం తీసుకున్నట్లు తెలిపింది.
ఇదీ చదవండి: కరోనాతో స్టాక్ మార్కెట్లకు గండం తప్పదా?
