దేశవ్యాప్తంగా ఆహార ప్రియులు ఇష్టపడే పదార్థాల్లో బిర్యానీ తొలివరుసలో ఉంటుంది. భారతీయ ఆహార రంగంలో భారీ డిమాండ్ దీని సొంతం. ఈ నేపథ్యంలో బిర్యానీ ప్రియులను మెప్పించేందుకు ప్రముఖ అంతర్జాతీయ ఆహార సంస్థ డోమినోస్ పిజ్జా సిద్ధమౌతోంది. 'ఏక్దమ్' అనే పేరుతో తాము బిర్యానీ మార్కెట్లోకి ప్రవేశిస్తున్నట్లు 'జుబ్లెంట్ ఫుడ్ వర్క్స్' లిమిటెడ్ ఓ ప్రకటనలో వెల్లడించింది. తమ బిర్యానీ తొలుత గురగ్రామ్లోని మూడు రెస్టారెంట్లలో లభిస్తుందని.. అనంతరం దిల్లీ తదితర ముఖ్య పట్టణాల్లో కూడా అందజేస్తామని ఈ సంస్థ వెల్లడించింది. తమ సేవలు యాప్, వెబ్సైట్లలో కూడా అందుబాటులో ఉంటాయని జేఎఫ్ఎల్ తెలిపింది.
దేశవ్యాప్తంగా ప్రసిద్ధి పొందిన హైదరాబాదీ నిజామీ బిర్యానీ, లఖ్నవీ నవాబ్ బిర్యానీ, కోల్కతా బిర్యానీ, బటర్ చికెన్ బిర్యానీ తదితర 20 రకాల బిర్యానీలను వినియోగదారులకు అందజేయనున్నామని జేఎఫ్ఎల్ వివరించింది. శాఖాహార, మాంసాహార బిర్యానీలను వేర్వేరు వంటశాలల్లో తయారు చేస్తామని సంస్థ ప్రతినిధులు తెలిపారు. వీటితో పాటు కబాబ్లు, స్వీట్స్ కూడా లభిస్తాయని తెలిపారు. ఆహారాన్ని చెదరని, పర్యావరణ హితమైన ప్రత్యేక దమ్ సీలుతో అందచేస్తారట. వీటి ధరలు రూ.99 నుంచి ప్రారంభమవుతాయని సంస్థ యాజమాన్యం అంటోంది.
జెఎఫ్ఎల్కు దేశంలోని 281 పట్టణాలు, నగరాల్లో డోమినోస్ పిజ్జా రెస్టారెంట్లను నిర్వహిస్తోంది. అంతే కాకుండా దేశంలోని ఎనిమిది నగరాల్లో 26 డంకిన్ డోనట్స్ రెస్టారెంట్లను కూడా నిర్వహిస్తోంది. భారత్తో పాటు శ్రీలంక, బంగ్లాదేశ్, నేపాల్లో కూడా ఈ సంస్థ కార్యకలాపాలు విస్తరించాయి.
ఇదీ చూడండి : స్థానిక భాషల్లో మరింత మందికి చేరువగా గూగుల్!
