దేశంలో కరోనా వైరస్ వ్యాప్తి పెరుగుతున్న క్రమంలో అంతర్జాతీయ విమానాల నిషేధాన్ని ఈనెల 30 వరకు పొడిగించింది పౌర విమానయాన శాఖ. ఈ మేరకు ఉత్తర్వులు జారీ చేశారు డైరెక్టర్ జనరల్ ఆఫ్ సివిల్ ఎవియేషన్ (డీజీసీఏ) డైరెక్టర్. అయితే సరకు రవాణాపై నిషేధాజ్ఞలు ఉండవని స్పష్టం చేశారు.
మధ్య సీట్లు ఖాళీగా ..
దేశీయ విమాన సేవలు ప్రారంభమైన నేపథ్యంలో పలు జాగ్రత్తలు తీసుకోవాలని పేర్కొంది డీజీసీఏ. సీట్ల నిర్వహణలో భాగంగా మధ్య సీటును ఖాళీగా ఉంచాలని ఎయిర్లైన్స్కు సూచించింది. ప్రయాణికుల రద్దీ ఎక్కువగా ఉండి మధ్య సీటును కేటాయించినట్లయితే అదనపు రక్షణ చర్యలు తీసుకోవాలని స్పష్టం చేసింది. కేంద్ర జౌళి శాఖ అనుమతించిన ప్రమాణాలతో వ్యక్తిగత భద్రత గౌను, మాస్కు వంటివి తప్పనిసరిగా ఇవ్వాలని పేర్కొంది.
రెండు నెలల లాక్డౌన్ తర్వాత మే 25 నుంచి దేశీయ విమాన సర్వీసులను పునరుద్ధరించింది భారత్.
