కరోనా మహమ్మారి ధాటికి ప్రజలంతా ఇళ్లకే పరిమితం అయ్యారు. పట్టణ ప్రజల నుంచి పల్లె వాసుల వరకు అందరూ నెట్టింట్లోనే కాలక్షేపం చేస్తున్నారు. ఫలితంగా గ్రామీణ ప్రాంతాల్లో అంతర్జాల వినియోగం 100 శాతం పెరిగిందని తెలిపారు కామన్ సర్వీస్ సెంటర్స్(సీఎస్సీ) సీఈఓ దినేశ్ త్యాగి.
నెలరోజుల్లోనే అధికం
ఇంటర్నెట్ సేవలు అందించే సీఎస్సీ ఈ-గవర్నెన్స్ సర్వీసెస్ ఇండియా ప్రకారం మార్చి 10 నాటికి గ్రామీణ ప్రాంతాల్లో 2.7 టీబీ డేటా వినియోగించారు. మార్చి 30 నాటికి ఈ వినియోగం 4.7 టీబీకి చేరింది. లాక్డౌన్ ప్రారంభం అయినప్పటి నుంచే నెట్ వినియోగం పెరిగిందని చెప్పారు త్యాగి.
" గ్రామీణ ప్రాంతాల్లో డేటా వినియోగం పెరగడమే కాకుండా, ఎఫ్టీటీహెచ్(ఫైబర్ టూ హోమ్) డిమాండ్ అధికంగా ఉంది. కేవలం మార్చి 20లోనే ఎఫ్టీటీహెచ్ కోసం 50 వేల గ్రామ పంచాయతీల్లో 3 లక్షలకు పైగా చందాదారులు నమోదు చేసుకున్నారు. సీఎస్సీ వైఫై చౌపాల్ సేవల పేరిట సుమారు 25 వేల గ్రామ పంచాయతీలకు పైఫై హాట్స్పాట్లను సీఎస్సీ అందిస్తుంది. ఈ వైఫై చౌపాల్లో ఇప్పటికే 12 లక్షలకు పైగా రిజిస్టర్డ్ చందాదారులు ఉన్నారు. వీరంతా తన ఫోన్ల ద్వారా కనెక్షన్ కలిగి ఉన్నారు. దీనివల్ల గ్రామీణ ప్రాంతాల్లో ఇంటర్నెట్ను ఎంతగా కోరుకుంటున్నారో అర్ధమవుతోంది."
-- దినేశ్ త్యాగి, సీఎస్సీ ఎస్పీవీ సీఈఓ
దేశంలో 60 కోట్లకు పైగా ఇంటర్నెట్ వినియోగదారులు ఉన్నారు. వీరిలో 29 కోట్ల మంది గ్రామీణ ప్రాంతాల్లోనే ఉన్నారు. గ్రామీణ ప్రాంతాల్లోని ప్రతి ఇంటికి బ్రాడ్ బ్యాండ్ సదుపాయాన్ని కల్పించాలనే ఉద్దేశంతో ప్రభుత్వం భారత్నెట్ ప్రాజెక్టును అమలు చేస్తోంది.
ఇదీ చదవండి: లాక్డౌన్లో ఏ మొబైల్ గేమ్ ఎక్కువగా ఆడుతున్నారు?
