స్థిరాస్తి: కరోనా కాలంలో రియల్టర్ల బంపర్ ఆఫర్స్

కరోనా ప్రభావంతో తీవ్రంగా నష్టపోయిన స్థిరాస్తి వ్యాపారం.. క్రమంగా పుంజుకుంటోంది. అమ్మకాలు పెరిగేందుకు వ్యాపారులు రాయితీలు, బహుమతులు ప్రకటించటం కొనుగోళ్లకు ఊతమిచ్చాయి. జులై నుంచి స్థిరాస్తి అమ్మకాలు చురుకుగా సాగుతున్నాయని ప్రముఖ సంస్థ అనరాక్​ తెలిపింది. పండగ సీజన్​లో మరిన్ని ఆఫర్లతో ముందుకురానున్నట్లు స్పష్టం చేసింది.

కరోనా మహమ్మారి కారణంగా ఇళ్ల అమ్మకాలు తగ్గిన నేపథ్యంలో స్థిరాస్తి వ్యాపారులు ఇతర మార్కెటింగ్ వ్యూహాలపై దృష్టి సారించారు. ప్రత్యేక ఆఫర్లతో కొనుగోలుదారులను ఆకర్షించే ప్రయత్నాలు చేస్తున్నారు. ధరలు లేదా పన్నుల తగ్గింపు, ఉచిత కార్​ పార్కింగ్, ఇతర రాయితీలు​ వంటి ఆఫర్లు ఇస్తున్నారు.

కరోనా కాలంలో ఇళ్ల కొనుగోళ్లలో నగదు రాయితీలు స్థిరాస్తి వ్యాపారులకు సాయపడ్డాయి. ఈ ఏడాది గరిష్ఠ అమ్మకాలు జరిపేలా వచ్చే పండగ సీజన్​లోనూ ఈ ఆఫర్లను కొనసాగించే అవకాశం ఉందని నిపుణులు భావిస్తున్నారు.

ప్రత్యేక ఆఫర్లతో లాభాలు..

ఈ ఏడాది తొలి త్రైమాసికంలో గోద్రెజ్​ ప్రాపర్టీస్​ అద్భుతమైన ఆఫర్​ ప్రకటించింది. తొలుత 10శాతం కట్టి తర్వాత విడతల వారీగా 90 శాతం చెల్లింపులు చేసేలా ఓ స్కీమ్​ను అందుబాటులోకి తెచ్చింది. ఫలితంగా కరోనా సమయంలో రూ.1,500 కోట్ల వ్యాపారం జరిగింది. బెంగళూరుకు చెందిన ఎంబసీ గ్రూప్​ కూడా ఇదే విధంగా లాభాలు ఆర్జించింది.

వచ్చే ఏడాది మార్చి వరకు స్టాంప్ డ్యూటీని తగ్గించాలని మహారాష్ట్ర ప్రభుత్వం నిర్ణయం తీసుకుంది. ప్రముఖ సంస్థ నారెడ్కో కూడా తమకు చెందిన 1,000 ప్రాజెక్టుల్లో స్టాంప్ డ్యూటీని భరిస్తామని ప్రకటించింది.

ఆన్​రాక్​ విశ్లేషణ..

ప్రముఖ స్థిరాస్తి అధ్యయన సంస్థ 'అనరాక్​'.. మార్కెట్​లోని వివిధ ఆఫర్లను విశ్లేషించింది. పండగ సీజన్​లో మరిన్ని ప్రత్యేకమైన ఆఫర్లతో పలు సంస్థలు రానున్నట్లు తెలిపింది. అనరాక్​ నివేదికలోని కీలకాంశాలు...

• కొన్ని సంస్థలు 1:9 నిష్పత్తి ఆఫర్​ను ప్రకటిస్తుండగా.. వీటిలో 15 శాతం రాయితీ కూడా ఉంటుంది.
• మరో సంస్థ పండగ సీజన్​లో కొన్నవారికి ఉచిత కార్​ పార్కింగ్​తో పాటు 7 శాతం నగదు రాయితీ ఇస్తోంది.
• చెన్నైకి చెందిన ఓ సంస్థ.. సెప్టెంబర్​ 27లోపు బుకింగ్ చేసుకున్నవారికి ప్రత్యేక వెసులుబాట్లను కల్పిస్తోంది. ఉచిత రిజిస్ట్రేషన్​తోపాటు అధునాతన వంటగదిని అందిస్తోంది.
• కొనుగోలు చేసినవారికి మరికొన్ని సంస్థలు బహుమతులు ఇస్తామని ప్రకటించాయి. లాప్​టాప్​, వాషింగ్ మెషీన్​, స్మార్ట్​ఫోన్​, మైక్రోవేవ్​, వీడియో డోర్​బెల్​, రిఫ్రిజ్​రేటర్​, చిమ్నీ.. ఇతర ఇంటి సామగ్రిని అందిస్తామంటున్నాయి.

ఆఫర్లతోనే అమ్మకాలు..

కరోనా సమయంలో చాలా మంది స్థిరాస్తి వ్యాపారులు.. జులై నుంచి ప్రత్యేక ఆఫర్ల ద్వారా అమ్మకాలు పెంచుకున్నారు. ముంబయిలోని లోధా గ్రూప్​.. సుమారు 1,167 కోట్ల విక్రయాలు చేసింది. ఎం3ఎం గ్రూప్​ ఇదేస్థాయిలో అమ్మకాలు జరిపింది.

కోలుకున్న వ్యాపారం..

స్థిరాస్తి వ్యాపారంపై కరోనా ప్రభావం భారీగా పడిందని ఇన్వెస్టర్స్ క్లినిక్​ వ్యవస్థాపకులు హనీ కటియాల్​ అన్నారు. అయితే, వినూత్న ఆలోచనలతో పరిశ్రమ కోలుకుంటోందని అన్నారు. వినియోగదారులు కొనుగోళ్లపై ఆసక్తి చూపేందుకు ఇవి సమర్థంగా పనిచేస్తున్నాయని వివరించారు. ఆస్తి మార్పిడి ప్రక్రియ ద్వారా రూ.750 కోట్ల అమ్మకాలు జరిగాయని తెలిపారు.

ఇదీ చూడండి: ఈ కామ్‌ ఎక్స్‌ప్రెస్‌లో 30వేల ఉద్యోగాలు