కొవాగ్జిన్ టీకా అన్ని రకాల కరోనా స్ట్రెయిన్లపైనా ప్రభావవంతంగా పనిచేస్తున్నట్లు భారత్ బయోటెక్ ఆదివారం ఓ ప్రకటనలో తెలిపింది. భారత్లో వెలుగుచూసిన బి.1.617, బ్రిటన్లో వెలుగుచూసిన రకం బి.1.1.7 స్ట్రెయిన్లనూ ఈ వ్యాక్సిన్ అంతం చేయగలదని స్పష్టం చేసింది. జాతీయ వైరాలజీ సంస్థ(ఎన్ఐవీ), భారత వైద్య పరిశోధన మండలి(ఐసీఎంఆర్) సంయుక్తంగా చేసిన అధ్యయనంలో ఇది వెల్లడైనట్లు పేర్కొంది. ఈ మేరకు భారత్ బయోటెక్ కో-ఫౌండర్ సుచిత్ర ఎల్ల ట్వీట్ చేశారు.
" కొత్త రకం స్ట్రెయిన్ల నుంచి రక్షణ కల్పిస్తుందని సైంటిఫిక్ రీసెర్చ్ డేటా పబ్లిష్ కావడం వల్ల కొవాగ్జిన్ మరోసారి అంతర్జాతీయ గుర్తింపు పొందింది. భారత్ బయోటెక్ కిరీటంలో ఇది మలో కలికితురాయి."
- సుచిత్ర ఎల్ల, భారత్ బయోటెక్ కో-ఫౌండర్, జాయింట్ డైరెక్టర్
ఈ ట్వీట్లో ప్రధాని కార్యాలయంతో పాటు ఆర్థిక మంత్రి నిర్మలా సీతారామన్, ఆరోగ్య మంత్రి హర్షవర్ధన్లను ట్యాగ్ చేశారు సుచిత్ర.
భారత్లో అందుబాటులో ఉన్న మూడు వ్యాక్సిన్లలో కొవాగ్జిన్ ఒకటి. ఐసీఎంఆర్ సహకారంతో హైదరాబాద్కు చెందిన భారత్ బయోటెక్ దీన్ని అభివృద్ధి చేసింది.
