భారత్లో చైనాకు చెందిన స్మార్ట్ఫోన్ల మార్కెట్ వాటా భారీగా తగ్గింది. లాక్డౌన్ సహా బాయ్కాట్ చైనా, వోకల్ ఫర్ లోకల్ సెంటిమెంట్తో.. ఏప్రిల్-జూన్ త్రైమాసికంలో దేశీయ స్మార్ట్ ఫోన్ మార్కెట్లో చైనా కంపెనీల వాటా 81 శాతం నుంచి 72 శాతానికి పడిపోయింది. కౌంటర్పాయింట్ రీసెర్చ్ విడుదల చేసిన తాజా నివేదికలో ఈ విషయం తెలిసింది. ఇదే సమయంలో దేశీయ స్మార్ట్ఫోన్ తయారీ కంపెనీలైన లావా, మైక్రోమ్యాక్స్ల మార్కెట్ వాటాలు స్వల్పంగా పెరిగినట్లు వెల్లడైంది.
కంపెనీల వారీగా..
దేశీయ స్మార్ట్ఫోన్ మార్కెట్ను ఏలుతున్న షియోమీ మార్కెట్ వాటా మార్చి త్రైమాసికంతో పోలిస్తే.. జూన్ త్రైమాసికంలో 30 శాతం నుంచి 29 శాతానికి తగ్గింది. ఇదే సమయంలో దక్షిణ కొరియాకు చెందిన శాంసంగ్ మార్కెట్ వాటా మాత్రం 26 శాతానికి పెరగటం గమనార్హం. దీనితో దేశంలో రెండో దేశీయ స్మార్ట్ఫోన్ మార్కెట్లో శాంసంగ్ మూడు నుంచి రెండో స్థానానికి ఎగబాకింది.
శాంసంగ్ తర్వాతి స్థానాల్లో వివో (17 శాతం), రియల్మీ (11 శాతం), ఒప్పో (9 శాతం) ఉన్నాయి.
ప్రీమియం స్మార్ట్ఫోన్ల సెగ్మెంట్లో వన్ప్లస్ అగ్రస్థానాన్ని నిలబెట్టుకుంది.
విక్రయాలు..
ఈ ఏడాది రెండో త్రైమాసికంలో స్మార్ట్ఫోన్ల విక్రయాలు 51 శాతం తగ్గి.. 18 మిలియన్ యూనిట్లకు పరిమితమైనట్లు కౌంటర్పాయింట్ వెల్లడించింది. గత ఏడాది ఇదే సమయంలో 37.7 మిలియన్ల స్మార్ట్ఫోన్లు విక్రయమవ్వడం గమనార్హం.
ఫీచర్ ఫోన్ల విభాగం..
ఫీచర్ ఫోన్ల విభాగంలో లావా 23 శాతం మార్కెట్ వాటాతో ప్రథమ స్థానంలో ఉంది. శాంసంగ్ (22 శాతం), నోకియా (9 శాతం), కార్బన్ (5 శాతం) తర్వాతి స్థానాల్లో ఉన్నాయి.
ఇదీ చూడండి:చైనాకు భారత్ మరో షాక్- బిడ్డర్లపై ఆంక్షలు!
