కరోనా కారణంగా ఆన్లైన్ షాపింగ్ వైపే మొగ్గుచూపుతున్నారు ప్రజలు. ఈ నేపథ్యంలో పెరుగుతున్న డిమాండ్కు తగినట్లుగా సేవలందించేందుకు సిబ్బందిని నియమించుకోవాలని నిర్ణయించింది ఈ-కామర్స్ దిగ్గజం అమెజాన్. ఈ ఏడాది మరో 1,00,000 మందిని తీసుకోనున్నట్లు ప్రకటించింది. ప్యాకింగ్, ఆర్డర్ల క్రమబద్ధీకరణ, రవాణా విభాగాల్లో పార్ట్టైం, ఫుల్టైమ్ విధానంలో అవసరం ఉన్నట్లు తెలిపింది సంస్థ. కరోనా సంక్షోభంతో ఉద్యోగాల్లో కోతలు విధిస్తున్న తరుణంలో అందుకు భిన్నంగా అమెజాన్ భారీ మొత్తంలో ఉద్యోగాలు కల్పించటం విశేషం.
ఈ కొత్త నియామకాలు సంస్థ హాలీడే-హైరింగ్కు సంబంధించినవి కావని వెల్లడించింది. ఈ నేపథ్యంలో ప్రైమ్ డే సమయాల్లో మరింత మందిని తాత్కాలిక ప్రతిపాదికన నియమించే అవకాశం ఉంది.
పెరుగుతున్న డిమాండ్ మేరకు ఇప్పటికే ఈ ఏడాది తొలినాళ్లలో 1,75,000 మంది సిబ్బందిని నియమించుకుంది అమెజాన్. మరో 33వేల కార్పొరేట్, టెక్ నిపుణులు అవసరమని కొద్ది రోజుల క్రితమే ప్రకటించింది. ఈనెలలో ప్రారంభించబోతున్న 100కుపైగా గిడ్డంగులు, ప్యాకేజీ కేంద్రాల వంటి ఇతర ప్రాంతాల్లో సిబ్బంది అవసరమవుతారని తెలిపింది.
అమెజాన్ ప్రైమ్ డే సహా హాలిడే షాపింగ్ రద్దీతో సంస్థ గిడ్డంగులు బిజీగా ఉండబోతున్నాయి. ఆయా రోజుల్లో భారీగా ఆర్డర్లు వచ్చే అవకాశం ఉన్న క్రమంలో అందుకు తగిన విధంగా సిద్ధమవుతోంది. కానీ, హాలీడే హైరింగ్లో ఎంతమందిని తీసుకుంటున్నారో ప్రకటించలేదు. గత ఏడాది హాలీడే షాపింగ్ సమయంలో 2 లక్షల మందికిపైగా నియమించుకుంది సంస్థ.
ఇదీ చూడండి: 33వేల ఉద్యోగాల నియామకానికి అమెజాన్ సిద్ధం
