ఈ-కామర్స్‌ దిగ్గజం అమెజాన్ ఇండియా భారత్లో వాహన బీమా రంగంలోకి అడుగుపెడుతోంది. ఇందుకోసం వాహన బీమా పాలసీలు అందించేందుకు ఆకో జనరల్ ఇన్సూరెన్స్తో అమెజాన్ పే చేతులు కలిపింది.
ప్రైమ్ సభ్యులకు రాయితీ..
వినియోగదారులు బీమా పథకాలను సులభంగా కొనుగోలు చేసేందుకు అమెజాన్ పే సహకారం అందించనుంది. అమెజాన్ ప్రైమ్ సభ్యులకు రాయితీల వంటి అదనపు ప్రయోజనాలు కూడా ఉంటాయని కంపెనీ ఒక ప్రకటనలో వెల్లడించింది.
అమెజాన్ పే పేజ్, అమెజాన్ యాప్‌ లేదా మొబైల్‌ వెబ్‌సైట్‌ ద్వారా వినియోగదారులు వాహన బీమా తీసుకోవచ్చు. పేరు, చిరునామా లాంటి ప్రాథమిక వివరాలు అందించడం ద్వారా కారు లేదా బైకుకు ఎంత బీమా ప్రీమియం చెల్లించాల్సి వస్తుందనే వివరాలను వాళ్లు తెలుసుకోవచ్చు.
అంతా పేపర్లెస్..
బీమా కొనుగోలే కాదు క్లెయిమ్‌లను కూడా పేపర్లెస్గా సమర్పించవచ్చు. గంటలో పిక్‌-అప్, మూడు రోజుల్లో క్లెయిమ్‌ల పరిష్కారం, ఎంపిక చేసిన నగరాల్లో ఏడాది పాటు రిపేరింగ్‌ వారెంటీ లాంటివి మరికొన్ని ప్రత్యేకతలు ఇందులో ఉన్నాయని కంపెనీ తెలిపింది. తక్కువ విలువతో కూడిన క్లెయిమ్‌లకు తక్షణమే నగదు రూపేణా సెటిల్‌మెంట్‌ అవకాశాన్ని కూడా పాలసీదార్లు ఎంపిక చేసుకోవచ్చు.
బీమా ప్రీమియంను అమెజాన్ పే బ్యాలెన్స్, యూపీఐ లేదా కార్డుల ద్వారా చెల్లించవచ్చుని అమెజాన్ పేర్కొంది.
