అమెరికా కాలిఫోర్నియాలో ఓ ఆసుపత్రిలో అద్భుతం చోటు చేసుకుంది. 5 నెలలకే అతితక్కువ బరువుతో జన్మించిన ఓ శిశువు ఆరోగ్యంగా పెరుగుతోంది. పుట్టినప్పుడు కేవలం పావుకిలో ఉన్న ఆ పాపాయి 'సేబీ' బరువు ప్రస్తుతం 2 కిలోలకు పెరిగింది. 5 నెలలుగా వైద్యుల పర్యవేక్షణలో ఉన్న బాలిక నేడు ఆసుపత్రి నుంచి డిశ్చార్జ్ అయింది.
శాన్ డియాగోలోని మేరీ బిర్చ్ ఆసుపత్రి ఈ అద్భుతానికి వేదికయింది. తక్కువ బరువుతో పుట్టి ఇంతకాలం ఆసుపత్రిలోనే ప్రత్యేక పర్యవేక్షణతో పెంచారు.
"శిశువు ఆరోగ్యంగా ఉండేలా మాకు సాధ్యమైనన్ని విధాలా పనిచేస్తాం. మిగితాదంతా ఆ పిల్లల చేతుల్లోనే ఉంటుంది. కొంత మందికి గర్భాశయం వెలుపల పెరిగే శక్తి ఉంటుంది."
- స్ప్రింగ్ బ్రిడ్జెస్, ఆసుపత్రి నర్సు
అత్యంత భయంకరమైన రోజు
సేబీ పుట్టిన నాడు అత్యంత భయకరంగా గడిచిందని సేబీ తల్లి తెలిపారు. ఆమెను ఆసుపత్రికి తీసుకొచ్చినప్పుడు 'ప్రీక్లాంప్సియా' వ్యాధితో బాధ పడుతున్నారు. ఆ సమయంలో రక్తపోటు 200లకు చేరుకోవటం వల్ల ముందుగానే శిశువుకు జన్మనిచ్చారామె. తన బిడ్డ బతికేందుకు కృషి చేసిన వారందరికీ కృతజ్ఞతలు తెలిపారు.
"నేను ఈ రోజు కోసం ఎదురుచూస్తున్నాను. మేం ఇంటికి వెళ్లినా ఈ రోజును నేను ఎప్పటికీ మరిచిపోను. ఈ రోజును ఏటా వేడుక చేసుకుంటాం. మా జీవితంలో ఇదో ప్రత్యేక సందర్భం."
-సేబీ తల్లి
అతి తక్కువ బరువుతో పుట్టిన శిశువు ఇన్ని రోజులు ఆరోగ్యంగా జీవించటం ఇదే మొదటి సారని 'యూనివర్సిటీ ఆఫ్ లోవా' ఆచార్యులు డాక్టర్ ఎడ్వర్డ్ బెల్ చెప్పారు.
ఇదీ చూడండి: ఈ 'మల్లేశం' ... అందరికీ ఆదర్శం
