జేఈఈ మెయిన్స్కు దరఖాస్తు చేసేటప్పుడు చేసిన చిన్న పొరపాటు వేల మంది తెలుగు విద్యార్థుల కొంప ముంచింది. కేంద్ర ప్రభుత్వం ఇటీవల ఖరారు చేసిన ఈడబ్ల్యూఎస్ రిజర్వేషన్లపై అవగాహన లేక చాలా మంది విద్యార్థులు నష్టపోయారు. సీబీఎస్ఈ మార్పులకు రెండుసార్లు అవకాశం కల్పించినప్పటికీ... విద్యార్థులు, తల్లిదండ్రులతో పాటు శిక్షణా సంస్థలు కూడా అప్రమత్తం కాలేదు. ఫలితంగా కటాఫ్ మార్కుల్లో భారీ తేడా జేఈఈ అభ్యర్థులను ఆందోళనకు గురిచేసింది. జేఈఈ అడ్వాన్స్డ్లోనైనా మార్పు చేసుకుందామంటే అవకాశం లేదు.
కొత్తగా ఈడబ్ల్యూఎస్ కేటగిరీ
జేఈఈ మెయిన్స్ కోసం దేశవ్యాప్తంగా 11 లక్షల 47 వేల మంది ఆన్లైన్లో దరఖాస్తు చేసుకున్నారు. ఆర్థికంగా వెనకబడిన వర్గాలకు కేంద్ర సర్కారు రిజర్వేషన్ ఖరారు చేయడం వల్ల ఈసారి దరఖాస్తులో ఆ విభాగాన్ని అధికారులు చేర్చారు. కుటుంబ వార్షిక ఆదాయం 8 లక్షల లోపు ఉన్నవారు... ఈడబ్ల్యూఎస్ కింద దరఖాస్తు చేసుకోవాలని సీబీఎస్ఈ సూచించింది. ప్రస్తుత దశలో ధ్రువీకరణ పత్రాలు కూడా సమర్పించాల్సిన అవసరం లేదు. గతంలో జనరల్ కేటగిరీ అభ్యర్థులు కొంత మంది ఇది గమనించకుండా పాత పద్ధతిలోనే దరఖాస్తు చేశారు. కేవలం 43 వేల మంది మాత్రమే రిజర్వేషన్ల ప్రకారం ఆన్లైన్లో తమ కేటగిరీని గుర్తించారు.
కటాఫ్ల్లో భారీ తేడా
జేఈఈ అడ్వాన్స్డ్కు జనరల్ కేటగిరీలో 89.75 పర్సంటైల్ కటాఫ్ ఉండగా... ఈడబ్ల్యూఎస్కు కేవలం 78.21 పర్సంటైల్ను ఖరారు చేశారు. దాదాపు 40 మార్కుల తేడా ఉండటం వల్ల చాలా మంది విద్యార్థులు అవకాశం కోల్పోయారు. ఇప్పుడు ఎలాంటి మార్పులు చేర్పులకు అవకాశం లేదని అధికారులు స్పష్టం చేశారు. నోటిఫికేషన్లో పూర్తి వివరాలు చదవక పోవడం వల్ల నష్టపోయామని ఈడబ్ల్యూఎస్ కింద అవకాశం చేజార్చుకున్న అభ్యర్థులు ఆవేదన వ్యక్తం చేస్తున్నారు.
ఇదీ చూడండి : ఇంటర్‌ ఫలితాలపై నేడు హైకోర్టులో విచారణ
