కోల్‌కతా టెస్టులో టీమ్‌ఇండియాను ఫాలోఆన్‌ ఆడించాలన్న కెప్టెన్ స్టీవ్ వా నిర్ణయం తప్పని ఆస్ట్రేలియా మాజీ లెగ్‌ స్పిన్నర్ షేన్ వార్న్ అభిప్రాయపడ్డాడు. 2001లో ఈడెన్ గార్డెన్స్లో జరిగిన ఈ మ్యాచ్‌లో స్టీవ్ మొండిగా వ్యవహరించాడని వార్న్ తెలిపాడు.
"అప్పుడు 45 డిగ్రీల ఎండ కాస్తోంది. చాలాసేపట్నుంచి మైదానంలో ఉన్నాం. వికెట్‌ కఠినంగా తయారవుతుంది. టీమ్‌ఇండియా 9 వికెట్లు కోల్పోయింది. ఆ సమయంలో స్టీవ్ బౌలర్ల దగ్గరకు వచ్చి 'మీకు ఎలా అనిపిస్తోంది' అని అడిగాడు. బౌలర్లంతా అలసిపోయామనే బదులిచ్చారు. అయితే వరుసగా 17 టెస్టుల విజయాల రికార్డు కోసం స్టీవ్ మొండిగా వ్యవహరించాడు. ఆ మ్యాచ్‌లో టీమ్‌ఇండియా గెలవడానికి ఫాలోఆన్‌ మాత్రమే ఏకైక మార్గం. ఒకవేళ మేం మళ్లీ బ్యాటింగ్‌ చేసుంటే 200 పరుగుల ఆధిక్యాన్ని 450కి పెంచేవాళ్లం. టీమ్‌ఇండియా మ్యాచ్‌ను కాపాడుకునేందుకు ప్రయత్నించేది. అప్పుడు మ్యాచ్‌ భిన్నంగా సాగేది. ఆ రోజు స్టీవ్‌ది తప్పుడు నిర్ణయం" అని వార్న్ చెప్పాడు.
