ఇళ్ల కొనుగోళ్లకు ప్రత్యేక వెబ్​సైట్​ ప్రారంభం

ఇళ్ల విక్రయాల కోసం 'హౌసింగ్ ఫర్​ ఆల్​' అనే వెబ్​సైట్​ను ప్రారంభించింది కేంద్ర పట్టణాభివృద్ధి, గృహనిర్మాణ శాఖ. రెరా కింద నమోదైన నాణ్యమైన, నమ్మకమైన ఇళ్లను ఈ వెబ్​సైట్​ ద్వారా విక్రయిస్తామని మంత్రిత్వ శాఖ కార్యదర్శి దుర్గాశంకర్ మిశ్రా తెలిపారు.

దేశవ్యాప్తంగా అందుబాటులో ఉన్న ఇళ్ల విక్రయం కోసం ప్రత్యేక వెబ్​సైట్​ను అందుబాటులోకి తెచ్చింది కేంద్రం. కేంద్ర పట్టణాభివృద్ధి, గృహనిర్మాణ శాఖ ఆధ్వర్యంలోని జాతీయ స్థిరాస్తి అభివృద్ధి మండలి (నరేడ్కో) https://www.housingforall.com/ వెబ్‌సైట్‌ను ప్రారంభించింది.

రెరా కింద నమోదైన నమ్మకమైన, భద్రమైన, నాణ్యమైన ఇళ్లను మాత్రమే ఈ వెబ్‌సైట్‌ ద్వారా విక్రయించనున్నట్లు కేంద్ర పట్టణాభివృద్ధి, గృహ నిర్మాణ శాఖ కార్యదర్శి దుర్గా శంకర్​ మిశ్రా ప్రకటించారు. పూర్తిగా సిద్ధమైన ఇళ్లను వర్చువల్‌ రియాల్టీ ద్వారా పరీక్షించుకుని ఎంపికచేసుకోవచ్చని చెప్పారు.

మార్చి 1 నుంచి విక్రయాలు

ఇందులో దాదాపు వెయ్యి ప్రాజెక్టులను లిస్ట్‌ చేయనున్నట్లు నరేడ్కో ప్రకటించింది. ఈ వెబ్‌సైట్‌లో పేర్లు నమోదు చేసుకోవడానికి స్థిరాస్తి వ్యాపారులకు ఫిబ్రవరి 13 వరకు గడువు ఉంటుంది. ఫిబ్రవరి 14 నుంచి వినియోగదారులకు పూర్తిగా అందుబాటులోకి వస్తుంది. మార్చి 1 నుంచి విక్రయాలు మొదలవుతాయి.