ఆగస్టు 5 నుంచి గృహ నిర్బంధంలోనే ఉంటున్న జమ్ముకశ్మీర్ మాజీ ముఖ్యమంత్రి ఫరూక్ అబ్దుల్లాపై కేంద్రం కఠిన చట్టం ప్రయోగించింది. ఇప్పటివరకు సాధారణ నిర్బంధంలో ఉన్న ఆయన్ను ప్రజా రక్షణ చట్టం(పీఎస్ఏ) కింద ఆదివారం అరెస్ట్ చేసినట్లు హోం శాఖ వర్గాలు తాజాగా వెల్లడించాయి.
పీఎస్ఏలో రెండు సెక్షన్లు ఉంటాయి. ఒకటి ప్రభుత్వ ఆదేశాల మేరకు అరెస్టు, రెండోది దేశ భద్రతకు ముప్పు నేపథ్యంలో నిర్బంధం.
పీఎస్ఏ చట్టంలోని మొదటి సెక్షన్ ప్రకారం.. ఏ వ్యక్తినైనా విచారణ లేకుండా 6 నెలల పాటు నిర్బంధంలోకి తీసుకోవచ్చు. రెండోదాని ప్రకారం.. గరిష్ఠంగా రెండేళ్లు అదుపులో ఉండాలి.
పీఎస్ఏ జమ్ముకశ్మీర్కు మాత్రమే వర్తిస్తుంది. దేశవ్యాప్తంగా దీనిని జాతీయ భద్రతా చట్టం(ఎన్ఎస్ఏ)గా పరిగణిస్తారు.
జైలుగా ఫరూక్ నివాసం...
ఫరూక్ అబ్దుల్లా శ్రీనగర్ నుంచి ఎంపీగా ప్రాతినిధ్యం వహిస్తున్నారు. జమ్మూకు మొత్తం 3 సార్లు ముఖ్యమంత్రిగా పనిచేశారు. తాజాగా ప్రభుత్వ ఉత్తర్వులతో శ్రీనగర్ గుప్కార్ రోడ్డులోని ఆయన నివాసాన్ని జైలుగా ప్రకటించారు.
ఫరూక్ అబ్దుల్లాను న్యాయస్థానంలో ప్రవేశపెట్టేలా ఆదేశించాలని... తమిళనాడు ఎండీఎంకే అధినేత వైగో దాఖలు చేసిన పిటిషన్పై సుప్రీంకోర్టు విచారణకు సరిగ్గా ఒక రోజు ముందు కేంద్రం ఈ చర్యలు తీసుకుంది.
ఇదీ చూడండి: బైక్పై తండ్రి శవాన్ని మోసుకొచ్చిన యువకుడు
