పుల్వామా ఉగ్రదాడి వెనుక ప్రధాన సూత్రధారి జైషే మహమ్మద్ ఉగ్రవాది 'ముదాసిర్ అహ్మద్ఖాన్' ఆలియాల్ 'మోహ్ద్ భాయ్' అని జాతీయ దర్యాప్తు సంస్థ (ఎన్ఐఏ) అధికారులు తెలిపారు.
పుల్వామా జిల్లా త్రాల్లోని మీర్ మొహల్లాకు చెందిన 23 ఏళ్ల ముదాసిర్ డిగ్రీ వరకు చదువుకున్నాడు. ఎలక్ట్రీషియన్గా పనిచేస్తుండేవాడు.
కశ్మీర్లోయలో ఉగ్రవాద చర్యలను పునరుద్ధరించడానికి ప్రయత్నిస్తున్న నూర్ మహ్మద్ తంత్రే (నూర్ త్రాలీ) ఆధ్వర్యంలో ముదాసిర్ 2017 సంవత్సరంలో జైషే మహమ్మద్ ఉగ్ర సంస్థలో చేరాడు. తాంత్రే మరణించిన తరువాత ఇంటి నుంచి వెళ్లిపోయిన ముదాసిర్, 2018 జనవరి 14 నుంచి ఉగ్రకార్యకలాపాల్లో చురుకుగా పాల్గొనేవాడని అధికారులు తెలిపారు.
ఇలా పథకం వేశారు...
జమ్ముకశ్మీర్ పుల్వామాలో ఫిబ్రవరి 14న జైషే మహమ్మద్ జరిపిన ఉగ్రదాడిలో 40 మంది సీఆర్పీఎఫ్ జవానులు మరణించారు. ఈ దాడికి పథక రచన చేసిన ముష్కరుడు ముదాసిరే. జవాన్ల వాహనాలపై ఆత్మాహుతి దాడి చేసిన ఆదిల్ అహ్మద్తో ముదాసిర్ తరచూ ఫోన్లో మాట్లాడేవాడు. దాడికి వాడిన వాహనాన్ని, పేలుడు పదార్థాలను ముదాసిరే సమకూర్చాడు. దాడికి కేవలం 10 రోజుల ముందే మారుతీ ఎకో మినీవ్యాన్ను కొన్నాడని అధికారులు తెలిపారు.
వీడొక రక్తపిశాచి
ముదాసిర్ ఇప్పటికే పలు దాడుల్లో కీలకపాత్ర వహించాడని అధికారులు చెబుతున్నారు. 2018 జనవరిలో లేత్పొరాలో సీఆర్పీఎఫ్ శిబిరంపై దాడిలో ముదాసిర్ పాల్గొన్నాడు. ఆ దాడిలో 5గురు సీఆర్పీఎఫ్ జవానులు మరణించారు. అలాగే ఫిబ్రవరి 2018లో సుజవాన్ సైనిక శిబిరంపై చేసిన దాడిలో కూడా ముదాసిర్ కీలకపాత్ర వహించాడు. ఆ దాడిలో 6 మంది సైనికులతోపాటు, ఒక స్థానికుడు మరణించారు.
ఎన్ఐఏ దర్యాప్తు
పుల్వామా దాడిపై విచారణ చేపట్టిన జాతీయ దర్యాప్తు సంస్థ (ఎన్ఐఏ) ఫిబ్రవరి 27న ఈ కరుడుగట్టిన ఉగ్రవాది ముదాసిర్ నివాసంలో సోదాలు జరిపింది. ప్రస్తుతం దక్షిణ కశ్మీర్లో బిజ్బెహారా ప్రాంతానికి చెంది సజ్జత్ భట్ జైషే మహమ్మద్ ఉగ్రకార్యకలాపాలకు నాయకత్వం వహిస్తున్నట్లు అధికారులు భావిస్తున్నారు.
