తాంత్రిక శక్తులతో భవిష్యత్తును మారుస్తానని స్నేహితుడి మాట విన్న ఓ వ్యక్తి అతన్ని హత్య చేసి కటకటాల పాలైన ఘటన ఉత్తర్ప్రదేశ్లోని ప్రయాగ్రాజ్లో జరిగింది. డిసెంబర్ 10న యమునా నగర్ ప్రాంతంలోని కార్చనలో మృతుడి ఆచూకీ లభ్యమైంది. పోలీసులు ఆ మృతదేహాన్ని స్వాధీనం చేసుకుని దర్యాప్తు ప్రారంభించారు. నిందితుడిని అదుపులోకి తీసుకుని విచారించగా.. అసలు విషయం వెలుగులోకి వచ్చింది.
అసలేం జరిగిందంటే...
పేద కుటుంబానికి చెందిన నితీశ్ సైనీ తన భవిష్యత్ గురించి తరచూ ఆందోళన చెందేవాడు. అలా ఆరు నెలల క్రితం హరిద్వార్‌లోని హర్ కీ పౌరికు వెళ్లిన నితీశ్కు.. ఆశిష్ దీక్షిత్ అనే వ్యక్తి పరిచయమయ్యాడు. ఈ క్రమంలో తన బాధలన్నీంటిని ఆ వ్యక్తికి చెప్పాడు. తనకున్న తాంత్రిక శక్తులతో కష్టాలన్నీ తీరుస్తానని అతను హామీ ఇచ్చాడు. దీంతో ఆశిష్ మాటలు విన్న నితీశ్ అతనితో పాటు హరిద్వార్లో నివాసం ఉండటం ప్రారంభించాడు.
అలా డిసెంబర్ 8న నితీశ్ సైనీ, ఆశిష్లు హరిద్వార్ నుంచి ప్రయాగ్‌రాజ్‌కు వెళ్లారు. అక్కడ కొలువుదీరిన అమ్మవారిని దర్శించుకున్నారు. కాసేపటి తర్వాత తనని చంపమని నితీశ్ను కోరాడు ఆశిష్. తాను చనిపోయి తిరిగి వస్తానని.. అప్పుడు తనకొచ్చిన తాంత్రిక శక్తులతో ఎన్నో అద్భుతాలు సృష్టిస్తానని నితీశ్ను నమ్మబలికాడు. ఆ మాటలు విని చంపేందుకు సిద్ధపడ్డ నితీశ్.. అతని మెడపై కొట్టాడు. దీంతో ఆశిష్ అక్కడికక్కడే మృతి చెందాడు. కేసు నమోదు చేసుకున్న పోలీసులు నితీశ్ను అదుపులోకి తీసుకుని తదుపరి విచారణను ప్రారంభించారు.
అరవై ఏళ్ల బామ్మపై దారుణం..
అరవై ఏళ్ల వృద్ధురాలిపై ఓ గుర్తు తెలియని వ్యక్తి అత్యాచారానికి పాల్పడిన ఘటన ఒడిశాలోని కటక్లో జరిగింది. నిస్సహాయ స్థితిలో ఉన్న ఆ బామ్మ జరిగిందంతా ఇరుగు పొరుగు వారికి వివరించగా వారు పోలీస్ స్టేషన్లో బాధితురాలి తరఫున ఫిర్యాదు చేశారు.
పోలీసుల కథనం ప్రకారం.. కటక్లోని బక్షి బజార్ పెన్షన్ లేన్లో ఒంటరిగా ఉంటున్న వృద్ధురాలిని టార్గెట్ చేసిన ఓ వ్యక్తి.. ఎవరూ లేని సమయం చూసుకొని ఆమెపై దారుణానికి ఒడిగట్టాడు. ఆ వృద్ధురాలు మూడు రోజుల తర్వాత తనపై జరిగిన అత్యాచారం గురించి పొరుగింటి వారితో చెప్పింది. దీంతో ఆమె తరఫున ఫిర్యాదు చేసేందుకు స్థానికులు పోలీస్ స్టేషన్ వెళ్లారు. వారి వద్ద నుంచి వివరాలు సేకరించిన పోలీసులు నిందితుడి కోసం గాలింపు చర్యలు ప్రారంభించారు.
మద్యం మత్తులో చిన్నారిని కిందకు తోసిన తండ్రి..
దిల్లీలోని కల్కాజీలో ముప్పై ఏళ్ల వ్యక్తి దారుణానికి ఒడిగట్టాడు. మద్యం మత్తులో ఉన్న ఆ వ్యక్తి ఇంటి మొదటి అంతస్తు నుంచి తన రెండేళ్ల కొడుకును కిందకు తోసేశాడు. ఆ తర్వాత తాను మూడో అంతస్తు నుంచి దూకి ఆత్మహత్యకు యత్నించాడు. తీవ్ర గాయాలపాలైన వారిద్దరూ... ప్రస్తుతం ఆస్పత్రిలో చికిత్స పొందుతున్నారని వైద్యులు తెలిపారు. భార్యతో గొడవల కారణంగానే ఆ వ్యక్తి ఈ దారుణానికి యత్నించినట్లు తెలుస్తోంది. తరచూ తమ మధ్య గొడవలు జరుగుతున్నాయని.. అందుకే ఆయన్ను వదిలేసి పిల్లలను తీసుకుని బంధువుల ఇంట్లో నివసిస్తున్నాని భార్య తెలిపింది.
