Young Author in Kerala: సాధారణంగా ఆటలంటే తెగ ఇష్టపడే పిల్లలు.. పుస్తకాలు చదవమనే సరికి మొహం చాటేస్తారు. అలాంటిది ఓ అమ్మాయి చిన్న వయసులోనే రచయితగా మారింది. పుస్తకాలు, పద్యాలు, సినిమా రివ్యూలు రాస్తూ అందరినీ ఆశ్చర్యపరుస్తోంది. ఎన్నో అవార్డులు కూడా అందుకుంది.
కేరళలోని కాసరగోడ్కు చెందిన 14 ఏళ్ల సనీషా.. స్థానిక ప్రభుత్వ పాఠశాలలో 9వ తరగతి చదువుతోంది. ఆటపాటలు, చదువుతో ఆడుతూపాడుతూ గడిపే ఆ వయసుకే సనీషా.. ఇంగ్లీష్, మలయాళంలో పుస్తకాలు రాస్తూ మంచి రచయితగా గుర్తింపు తెచ్చుకుంది. 6వ తరగతిలో ఉండగా రచనలపై పుట్టిన ఇష్టం ఆమెను ఇప్పటివరకు 13 పుస్తకాలు రాసేలా చేసింది. తొలిసారిగా ఆరో క్లాస్లో ఇంగ్లీష్లో పుస్తకాన్ని రాసిన సనీషా.. ఆ తర్వాత వివిధ నవలలు, షార్ట్ స్టోరీస్, పద్యాలు రాసింది. అంతేకాదు రెండు వందల క్లాసికల్ చిత్రాలకు రివ్యూలు కూడా రాసింది. సనీషానే స్వయంగా తను రచించిన పుస్తకాలకు కవర్ పేజీలను తయారు చేసుకోవడం విశేషం.
ఈ ప్రతిభే ఆమెను అవార్డులు వరించేలా చేసింది. సనీషా ప్రతిభను గుర్తించిన కేరళ ప్రభుత్వం.. 'ఉజ్వల బాల్యం' పురస్కారాన్ని అందజేసింది. వీటితో పాటు ఎన్ఎన్ కాక్కడ్ అవార్డు సహా గతేడాది ప్రముఖ రాయల్ కామన్వెల్త్ సొసైటీ అవార్డును కూడా అందుకుంది.
చిన్న వయసులోనే తన రచనలతో అద్భుతమైన ప్రతిభను కనబరుస్తున్న సనీషా.. భవిష్యత్తులో సినీ దర్శకురాలిని అవుతానని అంటోంది.
ఇదీ చూడండి : 'వైద్యుడితోనైనా బాక్సింగ్‌ చేసేంత బలంగా ఉన్నా'
