Woman Gives Birth On Train : ఓ నిండు గర్భిణీ రైలులో ప్రయాణిస్తుంది. ఒక్కసారిగా ఆమెకు పురిటినొప్పులు మొదలయ్యాయి. దీంతో అప్రమత్తమైన ఆమె భర్త.. రైల్వే అధికారులకు సమాచారం అందించాడు. రైల్వే వైద్యసేవల సిబ్బంది చురుగ్గా స్పందించి మహిళకు కంపార్ట్మెంట్లోనే డెలివరీ చేశారు. తల్లీబిడ్డ ఇద్దరూ ఆరోగ్యంగా ఉన్నట్లు వైద్యులు తెలిపారు. ఈ ఘటన కేరళలోని తిరువనంతపురం-సిల్చార్ ఎక్స్ప్రెస్ రైలులో గురువారం జరిగింది.
అసలేం జరిగిందంటే:
బంగాల్ రాష్ట్రం ఉత్తర దినాజ్పుర్కు చెందిన హన్స్దా థెరెసా, రుబిన్ దంపతులు ఇద్దరూ కూలీ పనులు నిమిత్తం కేరళకు వలస వెళ్లారు. రుబిన్.. తాపీ మేస్త్రీ కాగా. అతడి భార్య హన్స్దా రోజు వారీ కూలీగా పనిచేసేది. ఈ క్రమంలో కొద్ది రోజుల క్రితం హన్స్దా థెరెసా గర్భం దాల్చింది. దీంతో రుబిన్ పలుమార్లు స్వగ్రామం ఉత్తర దినాజ్పుర్కు వెళ్లాలని అనుకున్నా.. రైలు టిక్కెట్ రిజర్వేషన్ అవ్వనందున ప్రయాణం వాయిదా పడింది. భార్య డెలివరీ తేదీ దగ్గర పడడం వల్ల గురువారం తిరువనంతపురం- సిల్చార్ ఎక్స్ప్రెస్లో స్వగ్రామం బయలుదేరారు దంపతులు.
రైలు బర్ధమాన్ జంక్షన్ సమీపంలోకి చేరుకోగానే.. హన్స్దాకు నొప్పులు రావడం వల్ల ఆమె భర్త రుబిన్ రైల్వే అధికారులతో మాట్లాడి సహాయం కోరాడు. S-12 కంపార్ట్మెంట్లో ఉన్న మహిళ వద్దకు చేరుకున్న రైల్వే అధికారులు.. చికిత్స ప్రారంభించి విజయవంతంగా హన్స్దా థెరెసాకు డెలివరీ చేశారు. మానవతా దృక్పథంతో సానుకూలంగా స్పందించిన రైల్వే వైద్య సిబ్బంది పట్ల రుబిన్ సంతోషం వ్యక్తం చేశాడు. రైలులో మహిళ డెలివరీ అవ్వటం ఇదేమీ మొదటిసారి కాదు. గతంలో ఇలాంటి సంఘటనలు ఎన్నో జరిగాయని రైల్వే అధికారులు తెలిపారు.
ఒకే కాన్పులో ఐదుగురికి జన్మ.. అంతా బాలికలే.. గర్భిణీకి సాధారణ డెలివరీ..
ఝార్ఖండ్లోని రాంచీలో ఓ మహిళ ఒకే కాన్పులో ఐదుగురు శిశువులకు జన్మనిచ్చింది. గర్భం దాల్చిన ఏడు నెలలకే బిడ్డలకు జన్మనిచ్చింది. ఈ అరుదైన ప్రసవం ఈ ఏడాది మార్చ్ రిమ్స్ ఆస్పత్రిలో జరిగింది. కాగా శిశువులంతా బాలికలే కావటం గమనార్హం. ఐదుగురు చిన్నారులకు జన్మనిచ్చిన మహిళ ఛత్రా జిల్లాలోని ఇత్కోరీ ప్రాంతంలో నివసిస్తోంది. పలు సమస్యల వల్ల ఆమెకు గర్భం దాల్చడంలో అనేక ఇబ్బందులు ఎదురయ్యాయి. ఇందుకోసం ఆమె నిరంతరం చికిత్స తీసుకుంది. చివరకు గర్భం దాల్చింది. రిమ్స్ వైద్యుడు శశి బాల సింగ్ నేతృత్వంలోని డాక్టర్ల బృందం.. గర్భిణీకి సాధారణ ప్రసవం చేసింది. ఒకే కాన్పులో ఐదుగురు జన్మించడం ఝార్ఖండ్లో ఇదే తొలిసారి అని రిమ్స్ యాజమాన్యం వెల్లడించింది.
