Woman begging for money: వారణాసి వీధుల్లో.. ఆంగ్లంలో భిక్షాటన చేస్తూ ఇన్నేళ్లు కాలాన్ని వెళ్లదీసిన ఆంధ్రా మహిళ జీవితంలో వెలుగు వచ్చింది. తనకు సహాయం చేయాలంటూ యాచకురాలు స్వాతి చేసిన ఓ వీడియో.. ఆమె కుటుంబసభ్యుల వరకు చేరింది. నాలుగేళ్ల తర్వాత వారందరూ కలుసుకున్నారు.
'ప్లీజ్.. సహాయం చేయండి..'
ఆంధ్రప్రదేశ్ కర్నూల్కు చెందిన స్వాతికి కొన్నేళ్ల క్రితం వివాహమైంది. ఆ తర్వాత ఆమెకు పక్షవాతం వచ్చింది. శరీరంలోని ఒక భాగం పనిచేయడం మానేసింది. ఆ విషయం తెలుసుకున్న అత్తింటివారు.. ఆమెను వెలివేశారు. ఆ బాధతో ఆత్మహత్య చేసుకోవాలని నిర్ణయించుకుంది. ఎవరికీ చెప్పకుండా.. నాలుగేళ్ల క్రితం వారణాసికి వెళ్లింది. అక్కడ ప్రాణాలు వదిలితే మోక్షం వస్తుందని భావించి బలవన్మరణానికి సిద్ధపడింది.
అప్పుడే అస్సీ ఘాట్లో ఓ వ్యక్తితో స్వాతికి పరిచయమైంది. చివరకు వారిద్దరూ వివాహం చేసుకున్నారు. వారికి ఓ ఆడబిడ్డ కూడా జన్మించింది. కానీ అనారోగ్యం కారణంగా ఆ పసికందు మరణించింది. అప్పటి నుంచి అస్సీ ఘాట్ దగ్గరే భిక్షాటన చేసుకుంటూ జీవనం సాగించింది స్వాతి.
ఇదీ చూడండి:- యాచించే రోజులు పోయాయ్.. ఇంటికి చేరిన ఇంజినీర్
woman begging in varanasi: భిక్షాటన చేసుకుంటోందని స్వాతిని తక్కువ అంచనా వేయడానికి వీలు లేదు. ఆమెకు డిగ్రీ పట్టా ఉంది. ఆంగ్లంలో భిక్షాటన చేస్తున్న స్వాతిని చూసి అక్కడి ప్రజలు, పర్యటకులు ఆశ్చర్యపోయారు. కొందరు రేషన్, బట్టలు అందించారు.
స్వాతిని ఆదుకునేందుకు స్థానికులు కొందరు ముందుకొచ్చారు. ఆమెతో ఓ వీడియో చేసి సామాజిక మాధ్యమాల్లో విడుదల చేశారు. అందులో స్వాతి తన గురించి తాను చెప్పుకుంది.
"నమస్తే.. నా పేరు స్వాతి. నేను దక్షిణ భారతం నుంచి ఇక్కడకు వచ్చాను. బీఎస్సీ కంప్యూటర్స్ చదువుకున్నాను. నేను ఈ ఘాట్లోనే ఉంటాను. నాకు దుకాణం పెట్టుకోవాలని ఉంది. దయచేసి మీరు సహాయం చేయండి. నాకు కొంత డబ్బులు కావాలి. దుకాణం పెట్టుకోవడానికి డబ్బులు కావాలి. నేను ఎప్పుడూ ఈ మండపంలోనే ఉంటాను. మీరు ఎప్పుడొచ్చినా.. ఇక్కడే ఉంటాను. మీరు నాకు సహాయ చేయండి. ప్లీజ్.. హెల్ప్ చేయండి."
-- స్వాతి, ఆంధ్రప్రదేశ్వాసి
స్వాతి వీడియో సామాజిక మాధ్యమాల్లో వైరల్గా మారింది. కొద్ది రోజులకు ఆ వీడియో.. ఆమె పుట్టింటి వరకు చేరింది. విషయం తెలుసుకున్న ఆమె కుటుంబసభ్యులు.. స్వాతిని వెతుక్కుంటూ ఉత్తర్ప్రదేశ్ వెళ్లారు. సోదరుడు, కుటుంబసభ్యులను చూసి స్వాతి ఆనందంలో మునిగిపోయింది. నాలుగేళ్ల తర్వాత ఆమె తన ఇంటికి చేరింది.
ఇవీ చూడండి:-
