Ram Navami Stone pelting: శ్రీరామనవమి రోజున దేశంలోని పలు ప్రాంతాల్లో అవాంఛనీయ ఘటనలు జరిగాయి. మధ్యప్రదేశ్లోని రెండు జిల్లాల్లో హింసాత్మక పరిస్థితులు తలెత్తాయి. ఆదివారం ఖర్గోన్ జిల్లాలో రామనవమి ఊరేగింపుపైకి గుర్తుతెలియని వ్యక్తులు రాళ్లు రువ్వారు. వేరొక వర్గానికి చెందిన కొందరు.. ఊరేగింపులో పెట్టిన డీజే శబ్దాలకు అభ్యంతరం చెప్పారని.. ఇదే ఘర్షణకు దారితీసిందని స్థానికులు తెలిపారు. అధికారులు వెంటనే స్పందించి నగరమంతా 144 సెక్షన్ విధించారు. మూడు ప్రాంతాల్లో కర్ఫ్యూ విధించారు. ఇరువర్గాలను చెదరగొట్టేందుకు పోలీసులు బాష్పవాయు గోళాలను ప్రయోగించారు. ఆరుగురు కానిస్టేబుళ్లు సహా 24 మంది గాయపడ్డారు. ఖర్గోన్ ఎస్పీ సిద్ధార్థ్ చౌదరికి బులెట్ గాయాలయ్యాయి. అయితే ప్రస్తుతం పరిస్థితి అదుపులోనే ఉందని పోలీసులు తెలిపారు.
మరోవైపు, బార్వాణి జిల్లాలోని సెంధ్వా నగరంలోనూ ఇదే తరహా ఘటన జరిగింది. రాముడి శోభాయాత్రలో గుర్తు తెలియని వ్యక్తులు రాళ్లు విసిరారు. ఓ ప్రార్థనా స్థలాన్ని దుండగులు ధ్వంసం చేశారు. దీంతో ఘర్షణ చెలరేగింది. పోలీసులు రంగంలోకి దిగి.. పరిస్థితిని అదుపులోకి తెచ్చారు. అనంతరం రథయాత్ర సాఫీగా సాగింది.
Jharkhand Ram Navami Violence: ఝార్ఖండ్లోని లోహర్దగా జిల్లాలోనూ శ్రీరాముడి ఊరేగింపులో ఉద్రిక్త ఘటనలు తలెత్తాయి. ఆదివారం హిరాహి-హెంద్లాసో గ్రామంలో నిర్వహించిన శోభాయాత్రలో పాల్గొన్న భక్తులపై కొందరు రాళ్లు రువ్వారు. అనంతరం తొక్కిసలాట జరిగింది. ఇరువర్గాలు ఘర్షణకు దిగడం వల్ల.. ఆందోళనకర పరిస్థితులు తలెత్తాయి. పన్నెండుకు పైగా బైక్లు, ఓ పికప్ వ్యాన్కు దుండగులు నిప్పంటించారు. భోగతా గార్డెన్లో రెండు ఇళ్లు మంటల్లో కాలిపోయాయి. జిల్లా ఎస్పీ, కలెక్టర్.. ఘటనా స్థలానికి వచ్చి పరిస్థితిని సమీక్షించారు. భారీ సంఖ్యలో బలగాలను మోహరించారు. క్షతగాత్రులను ఆస్పత్రికి తరలించారు. తీవ్రంగా గాయపడ్డ ఓ వ్యక్తి.. చికిత్స పొందుతూ మరణించాడని పోలీసులు తెలిపారు.
Gujarat Ram Navami stone pelting: గుజరాత్లోని హిమ్మత్ నగర్, ఖాంభాత్ జిల్లాలోనూ ఉద్రిక్తతలు తలెత్తాయి. శ్రీరాముడి ఊరేగింపులో దుండగులు రాళ్లు రువ్వారు. ఐదు వాహనాలకు నిప్పంటించారు. హింసను అదుపు చేయడానికి ఏడు రౌండ్ల టియర్ గ్యాస్ను ప్రయోగించారు. ఘటనపై విచారణ చేపట్టారు.
ఆనంద్ జిల్లా ఖంభాట్ ప్రాంతంలోని రామ్జీ ఆలయం సమీపంలో రాముడి శోభాయాత్ర ప్రారంభమైన కొద్ది నిమిషాల్లోనే ఉద్రిక్తత ఏర్పడింది. ఊరేగింపు 500 మీటర్లు కొనసాగక ముందే కొందరు వ్యక్తులు రాళ్లు రువ్వారు. రోడ్డుకు సమీపంలోని ఓ మసీదు వద్ద ఘటన జరిగింది. పోలీసులు రంగంలోకి దిగేలోపే.. ఇరువర్గాలు పరస్పరం దాడులు చేసుకున్నాయి.
ఇదీ చదవండి: శ్రీరామనవమి రోజున మాంసాహారం.. జేఎన్యూలో విద్యార్థి వర్గాల ఘర్షణ
