తాలిబన్ల నేతృత్వంలోని అఫ్గాన్పై(Afghanistan) వైమానిక దాడులు జరిపేందుకు భారత ప్రభుత్వాన్ని తాము అనుమతి కోరామని అమెరికా విదేశాంగ శాఖ మంత్రి ఆంటోని బ్లింకెన్(Antoni Blinken) చేసిన వ్యాఖ్యలు కలకలం రేపాయి. ఈ మేరకు అక్కడి మీడియాలో వార్తలు వెలువడ్డాయి.
"అఫ్గాన్లోని కొత్త తాలిబన్ ప్రభుత్వాన్ని నిశితంగా పరిశీలించేందుకు భారత్తో అమెరికా పూర్తి స్థాయిలో సంప్రదింపులు జరుపుతోంది. వారిపై దాడి చేసేందుకు గల సామర్థ్యాన్ని నిరంతరం పరిశీలిస్తోంది. వాయవ్య భారత్ అత్యంత కీలకమైన ప్రాంతం. ఎందుకంటే... కతర్, దోహాతో పోల్చితే అఫ్గాన్కు వాయవ్య భారత్లోని ప్రాంతాలు చాలా తక్కువ దూరంలో ఉంటాయి. ఉగ్రవాదులకు, ముఖ్యంగా అల్-ఖైదా వంటి వారికి తమ దేశంలో స్థావరం ఇవ్వడం ద్వారా కలిగే పరిణామాల గురించి, తాలిబన్లకు బాగా తెలుసు."
-ఆంటోని బ్లింకెన్, అమెరికా విదేశాంగ శాఖ మంత్రి
బ్లింకెన్ వ్యాఖ్యలపై మాజీ మంత్రి, కాంగ్రెస్ అధికార ప్రతినిధి మనీష్ తివారీ(Manish Tiwari) ట్విట్టర్ వేదికగా స్పందించారు. ఈ మీడియా కథనాలు నిజమే అయితే.. దీనిపై స్పష్టత ఇవ్వాలని కేంద్రాన్ని డిమాండ్ చేశారు.
"వాయువ్య భారత్ నుంచి అఫ్గానిస్థాన్పై వైమానిక దాడులు చేసేందుకు అనుమతి ఇవ్వాలని అమెరికా విదేశాంగ మంత్రి ఆంటోని బ్లింకెన్.. భారత్ను కోరింది నిజమేనా? ప్రధానమంత్రి కార్యాలయంపై దీనిపై సాధ్యమైనంత త్వరగా స్పష్టత ఇవ్వాలి."
-మనీష్ తివారీ, కాంగ్రెస్ సీనియర్ నేత
'వినాశనమే..'
అమెరికా సైనిక కార్యకలాపాలు చేపట్టడం వల్ల ఎన్నో దేశాలు.. తీరని నష్టాన్ని చవి చూశాయని తివారీ పేర్కొన్నారు. వారిని అనుమతిస్తే భారత్లోనూ అదే పరిస్థితి తలెత్తుతుందని ఆవేదన వ్యక్తం చేశారు.
"70 ఏళ్లలో ఏ విదేశీ బలగాలు కూడా భారత్ను వినియోగించుకునేందుకు అనుమతించ లేదు. అలా చేస్తే.. భారత్ విధ్వంసకరంగా మారుతుంది. ఫిలిప్పీన్స్, కొరియా, ఒకైనావా, వియత్నాం, లాటిన్, దక్షిణ అమెరికా వంటి దేశాలు.. అమెరికా లేదా ఇతర దేశాలకు చెందిన బలగాలకు తమ దేశంలో చోటిచ్చి ఎంతో వినాశనాన్ని ఎదుర్కొన్నాయి. ఇప్పుడు అలా విదేశి బలగాలు.. భారత్కు చేరితే భారత సార్వభౌమత్వానికి ఎదురుదెబ్బ తగిలినట్లే. దేశ ప్రయోజనాలను మొత్తం అమ్మినట్లే."
-మనీష్ తివారీ, కాంగ్రెస్ నేత
క్వాడ్ సదస్సులో భాగంగా.. అమెరికా అధ్యక్షుడు జో బైడెన్ కలిసేందుకు, ప్రధానమంత్రి నరేంద్ర మోదీ ఈ నెల 24న అమెరికా వెళ్లనున్న తరుణంలో.. బ్లింకెన్ ఈ వ్యాఖ్యలు చేయడం గమనార్హం.
ఇదీ చూడండి: రక్షణ శాఖ నూతన భవనాలను ప్రారంభించనున్న ప్రధాని
