బంగాల్లో కరోనా కేసులు ఉద్ధృతమవుతున్న వేళ.. తదుపరి దశల్లో జరిగే ఎన్నికలపై పునఃపరిశీలించాలని ఆ రాష్ట్ర ముఖ్యమంత్రి, తృణమూల్ అధినేత్రి మమతా బెనర్జీ ఎన్నికల సంఘాన్ని కోరారు. మూడు దశల పోలింగ్ను ఒకరోజులో నిర్వహించేలా చర్యలు చేపట్టాలన్నారు. అలా కానిపక్షంలో కనీసం రెండు రోజుల్లోనైనా పూర్తి చేయాలని దినాజ్పుర్ ఎన్నికల ప్రచారం సందర్భంగా ఈసీని అభ్యర్థించారు దీదీ. ప్రజారోగ్యానికి ప్రాధాన్యతనిస్తూ ఈసీ తమ నిర్ణయాన్ని మార్చుకోవాలని సూచించారు.
"చేతులు జోడించి ఎన్నికల సంఘాన్ని అభ్యర్థిస్తున్నా. రాష్ట్రంలో జరిగే మిగిలిన మూడు దశల పోలింగ్ను ఒకే దఫాలో నిర్వహించండి. కుదరకపోతే కనీసం రెండు రోజులకు కుదించే ఏర్పాటు చేయండి."
- మమతా బెనర్జీ, బంగాల్ ముఖ్యమంత్రి
భాజపాకు అనుకూలంగా నిర్ణయాలు తీసుకోవద్దంటూ ఈసీని కోరారు దీదీ. ప్రజల ఆరోగ్యాన్ని దృష్టిలో ఉంచుకుని పోలింగ్ షెడ్యూల్ను కుదించాలని కోరారు.
ఆ రాష్ట్రంలో 294 అసెంబ్లీ స్థానాలకు గానూ.. ఇప్పటికే ఐదు విడతల్లో 180 నియోజకవర్గాలకు పోలింగ్ జరిగింది. మిగిలిన 114 సీట్లకు మూడు దశల్లో ఏప్రిల్ 22 నుంచి 29 వరకు ఎన్నికలు జరగనున్నాయి.
ప్రత్యేక టాస్క్ఫోర్స్తో..
బంగాల్లో కరోనాను అరికట్టేందుకు ప్రత్యేక టాస్క్ఫోర్స్ను ఏర్పాటు చేసినట్టు ఎన్నికల ర్యాలీలో పేర్కొన్నారు మమత. కొవిడ్ పరిస్థితులపై ప్రజలు ఏ మాత్రం ఆందోళన చెందాల్సిన అవసరం లేదన్నారు. వైరస్ను కట్టడిచేసేందుకు రాత్రి కర్ఫ్యూ ఒక్కటే పరిష్కారం కాదన్న ఆమె.. ఆస్పత్రుల్లో కొవిడ్ రోగుల కోసం పడకల్ని పెంచడం సహా ఇతర సమస్యలను పరిష్కరించేందుకు అన్ని చర్యలు చేపట్టినట్టు తెలిపారు.
ఇదీ చదవండి: అదనపు టీకాల కోసం మోదీకి దీదీ విజ్ఞప్తి
