తండ్రీకొడుకుల మధ్య ఆస్తి, చదువు, ఉద్యోగం విషయంలో గొడవలు రావడం సర్వ సాధారణం. ఈ కథల మీద ఎన్నో సినిమాలు కూడా వచ్చాయి. అయితే అన్నింటికీ భిన్నంగా, విన్న వారందరినీ షాక్కు గురిచేస్తూ.. ఉత్తర్ప్రదేశ్ బదాయూ జిల్లాలో ఓ ఘటన జరిగింది. ఇక్కడ తండ్రీకొడుకులు గొడవపడింది ఓ మహిళ కోసం. కొడుకు నుంచి విడాకులు తీసుకున్న భార్య.. ఇప్పుడు తండ్రిని పెళ్లి చేసుకుంది. సరిగ్గా గమనిస్తే, అప్పటివరకు భార్యగా ఉన్న ఆమె.. ఆ కొడుకుకు ఇప్పుడు సవతి తల్లి అయ్యి కూర్చుంది. ఈ కథ వెనక ఓ హై డ్రామానే ఉంది.
ఇంట్లో నుంచి వెళ్లిపోయి..
2016లో సంబంధిత వ్యక్తికి ఓ అమ్మాయితో వివాహమైంది. అప్పటికి వారిద్దరూ మైనర్లే. కానీ 6 నెలల తర్వాత వారిద్దరూ విడిపోయారు. అమెతో తిరిగి బంధం ఏర్పరచుకునేందుకు అతను ప్రయత్నించినా ఫలితం దక్కలేదు. అతనొక తాగుబోతని, తనకు విముక్తి కావాలని చెప్పి ఆమె విడాకులు తీసుకుంది.
ఆ తర్వాత కొంతకాలానికి అతని తండ్రి ఇల్లు వదిలి వెళ్లిపోయాడు. వెంటనే జిల్లా పంచాయతీ అధికారులను ఆశ్రయించాడు. తన తండ్రి వివరాలు సేకరించాలని ఆర్టీఐ దాఖలు చేశాడు.
ఇదీ చూడండి:- కాబోయే కోడలు.. తన కూతురే అని తెలిస్తే?
ఇక్కడే అసలు కథ బయటపడింది. ఆ 48 ఏళ్ల తండ్రి.. కొన్నేళ్ల క్రితం కొడుకు పెళ్లిచేసుకున్న అమ్మాయిని తిరిగి వివాహమాడి, సంభాల్ ప్రాంతంలో కలిసి జీవితం సాగిస్తున్నాడని తెలిసింది. అంటే.. భార్య స్థానంలో ఉన్న మహిళ ఇప్పుడు ఆ కొడుకుకు సవతి తల్లిగా మారింది! ఇక ఈ వార్త వినగానే ఆ కొడుకు నివ్వెరపోయాడు.
షాక్ నుంచి తేరుకున్న తర్వాత ఆ వ్యక్తి బిసౌలీ పోలీస్ స్టేషన్లో ఫిర్యాదు చేశాడు. సమస్యను పరిష్కరించేందుకు పోలీసులు తండ్రీకొడుకుల మధ్య ఇటీవలే ఓ సమావేశాన్ని ఏర్పాటు చేశారు. కానీ వారిద్దరూ వాగ్వివాదానికి దిగారు. దీంతో పరిస్థితి మరింత తీవ్రంగా మారింది.
అయితే తల్లిగా మారిన ఆ మాజీ భార్య మాత్రం.. రెండో భర్తతోనే సుఖంగా ఉన్నట్టు వెల్లడించింది. మొదటి భర్త దగ్గరకు వెళ్లే ప్రసక్తే లేదని తేల్చిచెప్పింది.
ఇదీ చూడండి:- పెళ్లయ్యాక భార్య.. మహిళ కాదని తెలిస్తే..
