Target killings in Kashmir: జమ్ముకశ్మీర్లో కొద్ది రోజులుగా హిందువులే లక్ష్యంగా దాడులు జరుగుతున్న నేపథ్యంలో అక్కడి భద్రతపై ఉన్నత స్థాయి సమీక్ష సమావేశం నిర్వహించారు కేంద్ర హోంమంత్రి అమిత్ షా. దిల్లీలోని నార్త్బ్లాక్లోని హోంశాఖ కార్యాలయంలో జరిగిన ఈ భేటీలో కశ్మీర్లో పరిస్థితులు సహా అమర్నాథ్ యాత్ర భద్రతపై చర్చించారు. ఈ సమావేశానికి జాతీయ భద్రతా సలహాదారు అజిత్ డోభాల్, జమ్ముకశ్మీర్ లెఫ్టినెంట్ జనరల్ మనోజ్ సిన్హా, ఆర్మీ చీఫ్ జనరల్ మనోజ్ పాండే, యూనియన్ హోం సెక్రెటరీ అజయ్ కుమార్ భల్లా, సీఆర్పీఎఫ్ డీజీ కుల్దీప్ సింగ్, బీఎస్ఎఫ్ చీఫ్ పంకజ్ సింగ్, జమ్ముకశ్మీర్ డీజీపీ దిల్బాగ్ సింగ్ సహా ఉన్నతాధికారులు పాల్గొన్నారు.
కశ్మీర్లో గురువారం బ్యాంకు మేనేజర్ విజయకుమార్‌ను ఉగ్రవాదులు కాల్చిచంపిన కొన్ని గంటల వ్యవధిలోనే కేంద్ర హోం మంత్రి అమిత్ షా ఉన్నతాధికారులతో సమావేశం నిర్వహించారు. జాతీయ భద్రతా సలహాదారు అజీత్‌ డోభాల్, 'రా' చీఫ్ సామంత్‌ గోయల్‌ తదితరులు పాల్గొన్న ఈ భేటీలో గత మే నెల నుంచి వరుసగా లక్షిత హత్యలు జరుగుతున్న జమ్ముకశ్మీర్ శాంతిభద్రతలపై చర్చించారు. మే 1వ తేదీ నుంచి ఇప్పటి వరకు 10 మందిని హత్య చేశారు ఉగ్రవాదులు. బ్యాంకు మేనేజర్ తొమ్మిదో వ్యక్తి. గురువారమే జరిగిన మరో ఘటనలో కార్మికులు గాయపడ్డారు.
భారీగా కేంద్ర బలగాల మోహరింపు: జమ్ముకశ్మీర్లో లక్షిత దాడులు జరుగుతున్న నేపథ్యంలో అమర్నాథ్ యాత్రకు భద్రత కట్టుదిట్టం చేసింది కేంద్రం. మరిన్ని కేంద్ర బలగాలను మోహరించాలని ఆదేశించారు కేంద్ర హోంమంత్రి అమిత్ షా. ఉగ్రదాడులను అరికట్టేందుకు జమ్ముకశ్మీర్లో పోలీస్ వ్యవస్థను పటిష్ఠపరచాలని అక్కడి ప్రభుత్వానికి సూచించారు. మొత్తం 350 అదనపు కంపెనీల బలగాలకు ఆమోదం లభించగా.. ఇప్పటికీ 150 కంపెనీలు కశ్మీర్ చేరుకున్నాయని, మరో 200 కంపెనీలు జూన్ 10-20 మధ్యలో చేరుకుంటాయని అధికారులు తెలిపారు. జూన్ 15లోపు ఈ మోహరింపు పూర్తవుతుందని ఆశాభావం వ్యక్తం చేశారు.
ఇదీ చూడండి: ఉగ్రవాదుల మరో ఘాతుకం.. ఈసారి కార్మికులపై కాల్పులు
'ద కశ్మీర్ ఫైల్స్' రిపీట్.. హిందువులే లక్ష్యంగా ఉగ్ర దాడులు!
