మే 1 నుంచి కరోనా టీకాల ధరలను కొవిన్ పోర్టల్లో అందుబాటులో ఉంచుతామని కేంద్రం వెల్లడించింది. ప్రైవేటు వ్యాక్సినేషన్ సెంటర్లలో రిజిస్ట్రేషన్ చేయించుకునేటప్పుడు.. టీకాను ఎంచుకునే సౌలభ్యం ఉంటుదని తెలిపింది.
18-44 ఏళ్ల వయసు వారికి ఏప్రిల్ 28 నుంచి వ్యాక్సినేషన్ రిజిస్ట్రేషన్ ప్రారంభం కానున్న నేపథ్యంలో రాష్ట్రాలు, కేంద్ర పాలిత ప్రాంతాలకు లేఖ రాశారు కేంద్ర ఆరోగ్య శాఖ కార్యదర్శి రాజేశ్ భూషణ్. వ్యాక్సిన్ పంపిణీ చేపడుతున్న ప్రైవేటు సెంటర్లన్నీ.. కరోనా టీకా రకం, వాటి నిల్వలు, కేంద్రం నిర్ణయించిన ప్రకారం వాటి ధరను కొవిన్ పోర్టల్లో తప్పనిసరిగా చూపించాలని స్పష్టం చేశారు. ఈ వివరాలను జత చేసేందుకు పోర్టల్లో అవసరమైన మార్పులు చేస్తున్నట్లు చెప్పారు.
"కొవిన్ మాడ్యూల్లో టీకా ధర, రకం వంటి వివరాలను పొందుపరుస్తాం. తద్వారా వ్యాక్సినేషన్ అపాయింట్మెంట్ సమయంలో పౌరులు తమ టీకాను ఎంపిక చేసుకోవచ్చు"
- రాజేశ్ భూషణ్, కేంద్ర ఆరోగ్య శాఖ కార్యదర్శి.
ఆన్లైన్ రిజిస్ట్రేషన్ చేసుకున్నవారికే ప్రైవేటు కేంద్రాల్లో టీకా లభిస్తుందని రాజేశ్ భూషణ్ స్పష్టం చేశారు. ప్రాధాన్య జాబితాలో ఉన్నవారికి ప్రభుత్వ టీకా కేంద్రాల్లో వ్యాక్సిన్ ఉచితంగానే అందుతుందని చెప్పారు. 18-44 ఏళ్ల మధ్య వయసు వారికి ప్రైవేటు కేంద్రాల్లో టీకా అందిస్తారని పేర్కొన్నారు. 'ఆయా రాష్ట్రాల్లో అనుమతించిన ప్రకారం 45 ఏళ్ల లోపు పౌరులు ప్రభుత్వ కేంద్రాల్లో టీకా పొందేందుకు అర్హులే. రాష్ట్ర, కేంద్ర పాలిత ప్రభుత్వాలు టీకా తయారీదారుల వద్ద సేకరించిన డోసుల నుంచి ఈ అదనపు లబ్ధిదారులకు వ్యాక్సిన్ అందుతుంది' అని లేఖలో వివరించారు.
ఇదీ చదవండి- టీకా కోసం వారికి రిజిస్ట్రేషన్ తప్పనిసరి!
