మే 18 తర్వాతే సీఎంగా ప్రమాణస్వీకారం

ఈనెల 18 తర్వాతే కేరళ సీఎం పినరయి విజయన్​ ప్రమాణస్వీకారం చేయనున్నారు. కరోనా విజృంభణను దృష్టిలో ఉంచుకుని ఈ నిర్ణయం తీసుకున్నట్లు తెలుస్తోంది. మే 17న మంత్రుల జాబితా ఖరారు చేయనున్నట్లు సమాచారం.

కేరళ అసెంబ్లీ ఎన్నికల్లో రెండోసారి ఘనవిజయం సాధించిన సీఎం పినరయి విజయన్..​ మే 18 తర్వాతే ప్రమాణస్వీకారం చేయనున్నారు. కరోనా రెండోదశ వ్యాప్తి నేపథ్యంలో వైరస్ నియంత్రణకే తొలి ప్రాధాన్యం ఇవ్వనున్నట్లు పార్టీ నేతలు వెల్లడించారు.

ప్రమాణాస్వీకార కార్యక్రమాన్ని నిరాడంబరంగా జరపనున్నట్లు తెలుస్తోంది. అలాగే ఈ నెల 17న నిర్వహించనున్న పార్టీ భేటీలో మంత్రి పదవుల కేటాయింపుపై చర్చించనున్నట్లు సమాచారం.

అసెంబ్లీ ఎన్నికల్లో ఎల్​డీఎఫ్​ విజయం సాధించిన నేపథ్యంలో విజయన్ తన సీఎం పదవికి రాజీనామా చేశారు. అయితే గవర్నర్​ ​ఆరిఫ్ మహ్మద్​ ఖాన్​ కోరిక మేరకు తదుపరి ఏర్పాట్లు పూర్తయ్యే వరకు అపద్ధర్మ ముఖ్యమంత్రిగా కొనసాగుతారు.

2021 కేరళ అసెంబ్లీ ఎన్నికల్లో అధికార ఎల్​డీఎఫ్ 99 స్థానాల్లో గెలుపొంది రెండోసారి చారిత్రక విజయాన్ని సొంతం చేసుకుంది. కాంగ్రెస్ సారథ్యంలో యూడీఎఫ్​ 41 స్థానాలకే పరిమితమైంది. భాజపా ఖాతా తెరవలేకపోయింది.

ఇదీ చూడండి: 'ప్రతిపక్షాల ఐక్యతకు పవార్​ కృషి'