CM Bommai News: కర్ణాటక సరిహద్దులో మరాఠీలున్నారనే విషయాన్ని ప్రస్తావిస్తూ మహారాష్ట్ర ఉప ముఖ్యమంత్రి అజిత్ పవార్ చేసిన వ్యాఖ్యలపై దీటుగా స్పందించారు కన్నడ సీఎం బసవరాజ్ బొమ్మై. తమ రాష్ట్రంలోని అంగుళం భూభాగాన్ని కూడా పోనిచ్చే ప్రసక్తే లేదని తేల్చిచెప్పారు. సరిహద్దు అంశం ఇప్పటికే స్పష్టంగా ఉందని పేర్కొన్నారు.
మహారాష్ట్రలోనూ కన్నడ మాట్లాడే ప్రాంతాలున్నాయని, వాటిని ఎలా కర్ణాటకలో కలపాలని ఆలోచిస్తున్నామని బొమ్మై పేర్కొన్నారు. కొందరు తమ రాజకీయ మనుగడ కోసం భాషలు, ప్రాంతాలు వంటి అంశాలను లేవనెత్తుతారని ఘాటు విమర్శలు చేశారు. ఇలాంటి ట్రిక్స్ ఉపయోగించి రాజకీయంగా ప్రయోజనం పొందాలనుకోవడం సరికాదన్నారు. మహారాష్ట్రలో ప్రస్తుతం రాజకీయ సంక్షోభం ఉందని, అందుకే ప్రజల దృష్టిని మరల్చేందుకు ప్రభుత్వం ఇలాంటి సరిహద్దు అంశాలను తెరపైకి తెస్తోందని బొమ్మై ధ్వజమెత్తారు.
