Couple Chain Snatching: సులభంగా డబ్బులు సంపాదించాలనే ఆలోచనతో గొలుసు దొంగతనాలకు పాల్పడుతున్న ఇద్దరు ప్రేమికులను తమిళనాడు కోయంబత్తూరు పోలీసులు అరెస్ట్ చేశారు. ప్రియురాలు బైక్ నడుపుతూ చిరునామా అడుగుతుండగా.. ప్రియుడు దొంగతనాలకు పాల్పడినట్లు పోలీసులు తెలిపారు. నిందితులను ప్రసాద్(20), తేజస్విని(20) గా గుర్తించారు.
ఇదీ జరిగింది: కోయంబత్తూరులోని తొండముత్తూర్ ప్రాంతానికి చెందిన కాలియమ్మాళ్ అనే మహిళ ఏప్రిల్ 28న పొలానికి సమీపంలో మేకను మేపుతోంది. స్కూటర్పై వచ్చిన ప్రేమికులు.. ఆ మహిళను చిరునామా అడిగారు. ఆమె వారికి అడ్రస్ చెప్తుండగా.. వెనుక కూర్చున్న ప్రసాద్ హఠాత్తుగా మహిళ మెడలోని గొలుసు లాగేశాడు. అనంతరం వారిద్దరూ అక్కడినుంచి పారిపోయారు. దీంతో మహిళ పోలీసులకు ఫిర్యాదు చేసింది. కేసు నమోదు చేసిన పోలీసులు.. సీసీటీవీలను పరిశీలించి నిందితులను అరెస్ట్ చేశారు.
నిందితులు పేరూర్ పచ్చపాళ్యంలోని ఓ ప్రైవేట్ కళాశాలలో బీటెక్ మూడో సంవత్సరం చదువుతున్నారని.. మూడేళ్లుగా ప్రేమించుకుంటున్నారని పోలీసులు చెప్పారు. ఆన్లైన్ బెట్టింగ్తో ప్రసాద్ పెద్ద మొత్తంలో డబ్బులు పొగొట్టుకున్నాడని పోలీసులు తెలిపారు. అప్పులు తీర్చేందుకే నిందితులు ఈ నేరాలకు పాల్పడ్డారని పేర్కొన్నారు. అంతకుముందు ప్రసాద్ ఇంట్లోనే 30 సవర్ల బంగారం పోయిందని.. విచారణలో ప్రసాద్ దొంగలించాడని తేలడం వల్ల అతడి తండ్రి కేసును ఉపసంహరించుకున్నాడని పోలీసులు తెలిపారు. నిందితులు ఇద్దరిని జ్యుడిషియల్ కస్టడీకి తరలించారు.
ఇదీ చదవండి: మద్యం కోసం రైలును ఆపేసిన డ్రైవర్.. మార్కెట్లో హంగామా!
