కేరళలో వరుసగా రెండోసారి విజయం సాధించిన పినరయి విజయన్.. ఈ నెల 20న ముఖ్యమంత్రిగా ప్రమాణస్వీకారం చేయనున్నారు. తిరువనంతపురంలోని సెంట్రల్ స్టేడియంలో మధ్యాహ్నం 3:30 గంటలకు ఈ కార్యక్రమం జరగనుండగా.. సీపీఎం నేతృత్వంలోని ఎల్డీఎఫ్ మరోసారి ప్రభుత్వాన్ని ఏర్పాటుచేయనుంది.
ఆ రాష్ట్ర గవర్నర్ ఆరిఫ్ మహ్మద్ఖాన్ విజయన్తో ప్రమాణం చేయించనున్నారు. సీఎంతో పాటు మరో 21 మంత్రులు కూడా అదే రోజు ప్రమాణం చేస్తారు. కరోనా వ్యాప్తి నేపథ్యంలో కొవిడ్ మార్గదర్శకాలను అనుసరించి నిరాడంబరంగానే ఈ కార్యక్రమాన్ని నిర్వహించనున్నారు.
మొత్తం 50వేల మంది సామర్థ్యం కలిగిన సెంట్రల్ స్టేడియంలో కేవలం 500 మంది అతిథుల సమక్షంలో ప్రమాణస్వీకారోత్సవం జరగనుందని సీఎం తెలిపారు. కొత్తగా ఎన్నికైన 140 ఎమ్మెల్యేలు, రాష్ట్రంలోని 29 మంది పార్లమెంట్ సభ్యులు, మీడియా ప్రతినిధులను మాత్రమే ఆహ్వానించినట్టు ఆయన పేర్కొన్నారు. కార్యక్రమానికి హాజరయ్యే వ్యక్తులు 48 గంటల ముందు టెస్టింగ్ చేయించుకున్న కొవిడ్-19 నెగెటివ్ రిపోర్ట్ను తప్పనిసరిగా చూపించాల్సి ఉంటుందని స్పష్టం చేశారు.
మొత్తం 140 అసెంబ్లీ స్థానాలున్న ఆ రాష్ట్రంలో వామపక్ష కూటమి 99 సీట్లను గెలుచుకుని అధికారాన్ని నిలబెట్టుకుంది. యూడీఎఫ్ కేవలం 41 స్థానాలకే పరిమితమైంది.
ఇదీ చదవండి: నారదా కుంభకోణం కేసులో ఆ నలుగురికీ బెయిల్
