మూఢ నమ్మకాలు ఓ వ్యక్తి ప్రాణాల్ని బలిగొన్నాయి. ఓ కుటుంబానికి జీవనాధారం లేకుండా చేశాయి. పిడుగు పాటుకు గురైన వ్యక్తిని ఆస్పత్రికి తరలించకుండా ఆవు పేడలో ముంచి చికిత్స అందించేందుకు యత్నించగా ప్రాణాలు కోల్పాయాడు. ఈ దుర్ఘటన ఛత్తీస్గఢ్లోని సర్గుజా జిల్లాలో జరిగింది.
అసలేం జరిగింది?
లఖన్పుర్ తాలుకాలోని ముత్కి గ్రామానికి చెందిన కిషన్ రామ్ రాజ్వాడా(35) అనే వ్యక్తి.. మంగళవారం మధ్యాహ్నం వర్షం కురుస్తుండగా తన ఇంటి ముందు నిలిచిన నీళ్లను తీసేందుకు బయటకు వచ్చాడు. ఆ సమయంలో అతని భార్య, ఇద్దరు పిల్లలు ఇంట్లోనే ఉన్నారు. ఇంతలో అతడు పిడుగుపాటుకు గురయ్యాడు. పిడుగు శబ్దం విని కుటుంబ సభ్యులు అరవగా.. ఇరుగుపొరుగువారు, ఊరిపెద్దలు అక్కడకు చేరారు. తీవ్రంగా గాయపడ్డ అతణ్ని తక్షణమే ఆస్పత్రికి తరలించకుండా.. ఆవుపేడతో తమకు తోచిన చికిత్స అందించారు.
విఫలయత్నం..
కిషన్ శరీరం మొత్తాన్ని పేడలో ముంచి తల భాగాన్ని మాత్రమే బయటకు వదిలేసి ఉంచారు. అలా చేస్తే అతడు కోలుకుంటాడు అని ఊహించారు. కానీ, వారి యత్నాలు ఫలించలేదు. కిషన్ ఆరోగ్య పరిస్థితి మరింత విషమించింది. దీంతో 108కి ఫోన్ చేసి అంబులెన్సు ద్వారా ఉదయ్పుర్లోని ఆస్పత్రికి తరలించారు. అయితే.. అతడు అప్పటికే.. మృతి చెందాడని అక్కడి వైద్యులు నిర్ధరించారు. పిడుగుపాటుకు గురైన వెంటనే ఆలస్యం చేయకుండా అతణ్ని ఆస్పత్రికి తీసుకువచ్చి ఉంటే బతికి ఉండేవాడని వారు చెప్పారు.
ఇదీ చూడండి: కొవిడ్ కేర్ సెంటర్గా తేజస్వీ అధికారిక నివాసం
ఇదీ చూడండి: కరోనాపై పోరులో అమరులైన 700 మంది టీచర్లు!
